ശ്രീ. അനൂപ് ജേക്കബ്

വകുപ്പുകൾ: ഭക്ഷ്യ-സിവിൽ സപ്ലൈസ്, ഉപഭോക്തൃകാര്യം, ലീഗൽ മെട്രോളജി 

പിറവം നിയോജക മണ്ഡലത്തെ പ്രതിനിധീകരിച്ച് കേരള നിയമസഭാംഗമായി പ്രവർത്തിക്കുന്ന അനൂപ് ജേക്കബ് 1977 ഡിസംബർ 16-ന് കോട്ടയം ജില്ലയിൽ ജനിച്ചു. മുൻ മന്ത്രിയും കേരള കോൺഗ്രസ് (ജേക്കബ്) നേതാവുമായിരുന്ന ടി.എം. ജേക്കബിന്റെയും ശ്രീമതി ആനി ജേക്കബിന്റെയും മകനാണ്. ബി.എ., എൽ.എൽ.ബി. ബിരുദധാരിയായ അദ്ദേഹം അഭിഭാഷകനും സാമൂഹിക-രാഷ്ട്രീയ പ്രവർത്തകനുമാണ്. ശ്രീമതി അനില മേരി ഗീവർഗീസ് ആണ് ഭാര്യ. മലയാളം, ഇംഗ്ലീഷ്, ഹിന്ദി ഭാഷകളിൽ പ്രാവീണ്യമുണ്ട്.

രാഷ്ട്രീയവും പൊതുജീവിതവും

വിദ്യാർത്ഥി രാഷ്ട്രീയത്തിലൂടെയാണ് അനൂപ് ജേക്കബ് പൊതുപ്രവർത്തന രംഗത്തേക്ക് കടന്നുവരുന്നത്. തിരുവനന്തപുരം മാർ ഇവാനിയോസ് കോളേജിൽ പഠിക്കുന്ന കാലത്ത് കോളേജ് മാഗസിൻ എഡിറ്ററായി (1996–1997) പ്രവർത്തിച്ചു. തുടർന്ന് കേരള സ്റ്റുഡന്റ്സ് കോൺഗ്രസ് (ജേക്കബ്) യൂണിറ്റ് പ്രസിഡന്റ്, തിരുവനന്തപുരം ജില്ലാ പ്രസിഡന്റ്, സംസ്ഥാന ജനറൽ സെക്രട്ടറി, സംസ്ഥാന പ്രസിഡന്റ് എന്നീ നിലകളിൽ സംഘടനയെ നയിച്ചു. കേരള യൂത്ത് ഫ്രണ്ട് (ജേക്കബ്) സംസ്ഥാന ജനറൽ സെക്രട്ടറി, പ്രസിഡന്റ് എന്നീ സ്ഥാനങ്ങളും വഹിച്ചു. 2004 മുതൽ കേരള കോൺഗ്രസ് (ജേക്കബ്) ഉന്നതാധികാര സമിതി അംഗമായി പ്രവർത്തിച്ചുവരുന്നു.

2012 ഏപ്രിൽ 12 മുതൽ 2016 മെയ് 20 വരെ ഭക്ഷ്യ, പൊതുവിതരണ, ഉപഭോക്തൃ സംരക്ഷണ, രജിസ്ട്രേഷൻ വകുപ്പ് മന്ത്രിയായി സേവനമനുഷ്ഠിച്ചു. 2013 മുതൽ കേരള കോൺഗ്രസ് (ജേക്കബ്) പാർട്ടി ലീഡറായും, 2016 മുതൽ പാർലമെന്ററി പാർട്ടി ലീഡറായും പ്രവർത്തിക്കുന്നു. യു.ഡി.എഫ്. പാർലമെന്ററി പാർട്ടി ട്രഷററായും അദ്ദേഹം ചുമതല വഹിക്കുന്നു. 2012-ൽ പിറവം നിയോജക മണ്ഡലത്തിൽ നടന്ന ഉപതിരഞ്ഞെടുപ്പിലൂടെ 13-ാം കേരള നിയമസഭയിലേക്ക് തെരഞ്ഞെടുക്കപ്പെട്ട അദ്ദേഹം, 2016-ൽ 14-ാം കേരള നിയമസഭയിലേക്കും 2021-ൽ 15-ാം കേരള നിയമസഭയിലേക്കും വീണ്ടും ജനവിധി നേടി.

 വിലാസം & ഫോൺ നമ്പറുകൾ 

മന്ത്രിയുടെ പേഴ്സണൽ സ്റ്റാഫ് വിവരങ്ങൾ

അവസാനമായി അപ്ഡേറ്റ് ചെയ്തത് : 06-07-2026