കലോത്സവത്തിൽ സമ്പൂർണ ഹരിതച്ചട്ടം:  ശുചിത്വം ഉറപ്പാക്കാൻ വലിയ സന്നാഹം

കലോത്സവത്തിൽ ശുചിത്വം ഉറപ്പാക്കാൻ വിപുലമായ സൗകര്യങ്ങളാണ് തിരുവനന്തപുരം കോർപറേഷനും സംഘാടകരും ഒരുക്കിയിരിക്കുന്നത്. മാലിന്യസംസ്‌കരണവുമായി ബന്ധപ്പെട്ട് ഒരുക്കിയ സജ്ജീകരണങ്ങളോട് സഹകരിക്കാൻ വിദ്യാർഥികളും രക്ഷിതാക്കളും അധ്യാപകരും കലോത്സവം കാണാനെത്തുന്ന പൊതുജനങ്ങളും ശ്രദ്ധിക്കണം. ബോധവത്കരണത്തിനായി ശുചിത്വമിഷനും സൗകര്യങ്ങളൊരുക്കിയിട്ടുണ്ട്.  പ്ലാസ്റ്റിക് ബോട്ടിലുകളുമായി വരുന്നവരിൽ നിന്നും 10 രൂപ ബോട്ടിൽ അറസ്റ്റ് ഫീസായി വാങ്ങാനും തിരികെ പോകുമ്പോൾ തുക തിരികെ നൽകാനുമുള്ള പദ്ധതിയാണ് ഏറെ പ്രത്യേകതയുള്ളത്.

25 വേദികളിൽ രണ്ട് ഷിഫ്റ്റിലായി ആകെ 50 ഹെൽത്ത് ഇൻസ്‌പെക്ടർമാർ, 100 ഹരിതകർമ്മ സേനാംഗങ്ങൾ, 100 ശുചീകരണ തൊഴിലാളികൾ എന്നിവരെയാണ് തിരുവനന്തപുരം കോർപറേഷൻ വിന്യസിച്ചിരിക്കുന്നത്.  ഭക്ഷണശാല ഒരുക്കിയിരിക്കുന്ന പുത്തരിക്കണ്ടം മൈതാനത്ത് രാവിലെ 6 മുതൽ രാത്രി 12  വരെ 3 ഷിഫ്റ്റുകളിലായി 100 ശുചീകരണത്തൊഴിലാളികളും 12 ഹെൽത്ത് ഇൻസ്‌പെക്ടർമാരും സേവനത്തിനുണ്ടാകും. മലിനജലം പുത്തരിക്കണ്ടത്ത് തന്നെ സംസ്‌കരിക്കുന്നതിന് മൊബൈൽ വാട്ടർ ട്രീറ്റ്‌മെന്റ് പ്ലാന്റ് സ്ഥാപിച്ചിട്ടുണ്ട്. 60 താൽക്കാലിക ടോയ്‌ലെറ്റുകളും പുത്തരിക്കണ്ടത്ത് സ്ഥാപിച്ചിട്ടുണ്ട്. കവടിയാർ മുതൽ അട്ടക്കുളങ്ങര വരെയുള്ള പ്രധാന റോഡും, വേദികളിലേക്കും അക്കോമഡേഷൻ  സെന്ററുകളിലേക്കുമുള്ള റോഡുകളും വൃത്തിയായി സൂക്ഷിക്കാൻ  രാവിലെ 6 മുതൽ രാത്രി 12 വരെ തൊഴിലാളികളെ നിയോഗിച്ചിട്ടുണ്ട്. 

എല്ലാ വേദികളിലും മാലിന്യങ്ങൾ വേർതിരിച്ച് ശേഖരിക്കുന്നതിനായി ജൈവമാലിന്യ ശേഖരണ ബിന്നും അജൈവമാലിന്യ ശേഖരണ ബിന്നും സ്ഥാപിച്ചിട്ടുണ്ട്. ഇത്തരം ബിന്നുകൾ താമസകേന്ദ്രങ്ങളിലും ഒരുക്കിയിട്ടുണ്ട്. ജൈവമാലിന്യം ശേഖരിച്ച് സംസ്‌കരിക്കുന്നതിന് അംഗീകൃത ഏജൻസികൾക്ക് ചുമതല നൽകിയിട്ടുണ്ട്. വേദികളിൽ നിന്നും അക്കോമഡേഷൻ സെന്ററുകളിൽ നിന്നും ദിവസേന രണ്ട് നേരം സാനിട്ടറി പാഡ് ഉൾപ്പെടെയുള്ള ബയോമെഡിക്കൽ മാലിന്യങ്ങൾ ശേഖരിക്കും. ഇതിന് പുറമേ സെപ്‌റ്റേജ് മാലിന്യം ശേഖരിക്കുന്നതിനുള്ള വാഹന സൗകര്യം പൂർണസമയം ലഭ്യമാണ്. 25 അക്കോമഡേഷൻ സെന്ററുകളിലും ക്ലീനിംഗ് പൂർത്തിയാക്കിയിട്ടുണ്ട്. ഇവിടെ എല്ലാ ദിവസവും ഫോഗിംഗ് നടത്തും. ഇക്കാര്യങ്ങൾ കൃത്യമായി നടക്കുന്നുവെന്ന് ഉറപ്പാക്കാനും പരാതികൾ തീർപ്പാക്കാനുമായി പുത്തരിക്കണ്ടത്തും സെൻട്രൽ സ്റ്റേഡിയത്തും കൺട്രോൾ റൂമും കോർപറേഷൻ ഒരുക്കിയിട്ടുണ്ട്.കേരളീയം, ചലച്ചിത്രോത്സവം ഉൾപ്പെടെയുള്ള പരിപാടികളിൽ മികവേറിയ ശുചിത്വ പ്രവർത്തനം ഏറ്റെടുത്ത് നടത്തിയ പരിചയമുള്ള കോർപറേഷൻ കലോത്സവത്തിലും പുത്തൻ മാതൃക സൃഷ്ടിക്കും. 

അവസാനമായി അപ്ഡേറ്റ് ചെയ്തത് : 06-01-2025

ലേഖനം നമ്പർ: 1618