ഹീമോഫീലിയ ബാധിതർക്ക് സമഗ്രവും വിദഗ്ധവുമായ ചികിത്സയും തുടർപരിചരണവും ഉറപ്പാക്കുന്നതിനായി കോട്ടയം സർക്കാർ മെഡിക്കൽ കോളേജിലെ ഹീമോഫീലിയ സെന്ററിനെ സംസ്ഥാനത്തെ ആദ്യ സമഗ്ര തൃതീയതല ഹീമോഫീലിയ ചികിത്സാകേന്ദ്രമായി ഉയർത്തി. രോഗനിർണയം മുതൽ വിദഗ്ധ ചികിത്സയും പുനരധിവാസവും അനുബന്ധ ആരോഗ്യസേവനങ്ങളും വരെ ഒരേ സംവിധാനത്തിന് കീഴിൽ ഏകോപിപ്പിച്ച് ലഭ്യമാക്കുകയാണ് ലക്ഷ്യം.

രക്തം കട്ടപിടിക്കുന്നതിന് ആവശ്യമായ ഘടകങ്ങളുടെ കുറവിനെ തുടർന്ന് ഉണ്ടാകുന്ന ജനിതക രക്തസ്രാവ രോഗമാണ് ഹീമോഫീലിയ. രോഗബാധിതർക്ക് സമയബന്ധിത രോഗനിർണയം, രക്തസ്രാവം നിയന്ത്രിക്കുന്നതിനുള്ള ഘടകചികിത്സ, വിദഗ്ധ പരിചരണം, തുടർനിരീക്ഷണം എന്നിവ ഉറപ്പാക്കുന്നത് രോഗനിയന്ത്രണത്തിൽ നിർണായകമാണ്. ഈ ആവശ്യങ്ങൾ പരിഗണിച്ചാണ് ഹീമോഫീലിയ ചികിത്സാ സംവിധാനങ്ങളെ കൂടുതൽ ശക്തിപ്പെടുത്തുന്നത്.

കോട്ടയം മെഡിക്കൽ കോളേജിലെ ഹീമോഫീലിയ സെന്റർ കോട്ടയത്തിനും സമീപ ജില്ലകളിൽ നിന്നുള്ള രോഗികൾക്കും ചികിത്സയും തുടർപരിചരണവും ലഭ്യമാക്കുന്ന പ്രധാന കേന്ദ്രമായി പ്രവർത്തിക്കുന്നു. നിലവിലുള്ള സേവനങ്ങൾ കൂടുതൽ വിപുലീകരിച്ച് സംസ്ഥാനതലത്തിൽ സമഗ്ര തൃതീയ പരിചരണ കേന്ദ്രമായി വികസിപ്പിക്കുന്നതിലൂടെ വിവിധ രക്തസ്രാവ രോഗങ്ങൾക്ക് ആവശ്യമായ വിദഗ്ധ സേവനങ്ങൾ കൂടുതൽ ഏകോപിതമായി ലഭ്യമാക്കുന്നു.

വിവിധ രക്തസ്രാവ രോഗങ്ങളുമായി ബന്ധപ്പെട്ട സമഗ്ര പരിശോധന, വിദഗ്ധ ചികിത്സ, തുടർപരിചരണം എന്നിവ ഏകോപിപ്പിച്ചാണ് കേന്ദ്രത്തിന്റെ പ്രവർത്തനം. രോഗവുമായി ബന്ധപ്പെട്ട സങ്കീർണതകൾ നേരത്തെ തിരിച്ചറിയുന്നതിനും ആവശ്യമായ ചികിത്സ കൃത്യസമയത്ത് ലഭ്യമാക്കുന്നതിനും ഈ ഏകോപിത സംവിധാനത്തിലൂടെ സാധിക്കുന്നു. രോഗികളുടെ ശാരീരികവും മാനസികവുമായ ആരോഗ്യ ആവശ്യങ്ങൾ പരിഗണിച്ചുള്ള പരിചരണത്തിനും പ്രാധാന്യം നൽകുന്നു. ചികിത്സയ്‌ക്കൊപ്പം പുനരധിവാസ സേവനങ്ങളും അനുബന്ധ ആരോഗ്യപരിചരണവും ഏകോപിപ്പിക്കുന്നതിലൂടെ രോഗികളുടെ ജീവിതനിലവാരം മെച്ചപ്പെടുത്തുന്നതിനും സഹായിക്കുന്നു.

ക്ലിനിക്കൽ വിദഗ്ധർ, ഫിസിക്കൽ മെഡിസിൻ ആൻഡ് റീഹാബിലിറ്റേഷൻ വിദഗ്ധർ, പരിശീലനം നേടിയ നഴ്‌സിംഗ് ജീവനക്കാർ, പാത്തോളജിസ്റ്റുകൾ എന്നിവരുടെ സേവനം കേന്ദ്രത്തിൽ ലഭ്യമാക്കുന്നു. ഇതോടൊപ്പം ഓർത്തോപീഡിക്സ്, ഡെന്റൽ സർജറി, ഗ്യാസ്‌ട്രോഎൻട്രോളജി, സൈക്യാട്രി തുടങ്ങിയ വിഭാഗങ്ങളിലെ വിദഗ്ധ സേവനങ്ങളും ഏകോപിപ്പിക്കുന്നു.

ഹീമോഫീലിയ രോഗികളിൽ രക്തസ്രാവവുമായി ബന്ധപ്പെട്ടുണ്ടാകാവുന്ന സന്ധി, പേശി സംബന്ധമായ പ്രശ്നങ്ങൾ, ദന്താരോഗ്യ പ്രശ്നങ്ങൾ, ദഹനവ്യവസ്ഥയുമായി ബന്ധപ്പെട്ട സങ്കീർണതകൾ, മാനസികാരോഗ്യ ആവശ്യങ്ങൾ എന്നിവയ്ക്ക് ആവശ്യമായ വിദഗ്ധ പരിചരണം ഒരേ സംവിധാനത്തിന് കീഴിൽ ലഭ്യമാക്കാൻ ഇതിലൂടെ സാധിക്കുന്നു. സംസ്ഥാനത്തെ ആദ്യ സമഗ്ര തൃതീയതല ഹീമോഫീലിയ ചികിത്സാകേന്ദ്രം എന്ന നിലയിൽ കോട്ടയം മെഡിക്കൽ കോളേജ് രക്തസ്രാവ രോഗപരിചരണ രംഗത്ത് ഏകോപിത ചികിത്സാ സംവിധാനത്തിന് മാതൃകയാകുന്നു.

അവസാനമായി അപ്ഡേറ്റ് ചെയ്തത് : 2026-10-06 10:46:37