ദക്ഷിണേഷ്യയിലെ ഏറ്റവും വലിയ വ്യാപാരമേളകളിലൊന്നായ അന്താരാഷ്ട്ര വ്യാപാരമേളയിൽ സംസ്ഥാനത്തിന്റെ  വികസന മാതൃകകൾക്ക് നേർകാഴ്ചയൊരുക്കി കേരള പവലിയൻ.  ന്യൂ ഡൽഹിയിലെ പ്രഗതി മൈതാനിയിൽ നവംബർ 14 മുതൽ 27 നടക്കുന്ന 43-ാം മത് ഭാരത അന്താരാഷ്ട്ര വ്യാപാര മേള 'വികസിത് ഭാരത് @ 2047' എന്ന തീമിലാണ് സംഘടിച്ചിച്ചിരിക്കുന്നത്. സ്വയം പര്യാപ്തത, അഭിവൃദ്ധി, വികസനം അതുപോലെ നവീനവും, സുസ്ഥിരവും എല്ലാ വിഭാഗങ്ങളേയും ഉൾക്കൊണ്ടുള്ള ഭരണ സംവിധനത്തിലൂടെയുള്ള സാമ്പത്തിക വളർച്ചയും, സാമൂഹ്യ പുരോഗതിയുമാണ് മേളയിൽ   പ്രതിനിധാനം ചെയ്യുന്നത്. മേളയിൽ വിവിധ സംസ്ഥാനങ്ങൾക്കും കേന്ദ്രസർക്കാർ വകുപ്പുകൾക്കും പവലിയനുണ്ട്. സംസ്ഥാനത്തിന്റെ വികസനവും പ്രകൃതിഭംഗിയും പ്രദർശിപ്പിക്കുന്നതിനൊപ്പം കേരളം കൈവരിച്ച നേട്ടവും അത് രാജ്യപുരോഗതിയിലുണ്ടാക്കിയ മുന്നേറ്റവും ആസ്പദമാക്കിയ സംസ്ഥാനത്തിന്റെ പവലിയൻ ജനശ്രദ്ധയാർജ്ജിച്ചു വ്യാപാരമേളയിലെ പ്രധാന ആകർഷകമായി മാറി. 250 ചതുരശ്ര മീറ്ററിൽ ക്രമീകരിച്ചിരിക്കുന്ന കേരള പവലിയനിൽ 24 സ്റ്റാളുകളാണ് ക്രമീകരിച്ചിരിക്കുന്നത്.

വളർച്ചാ സൂചികയിൽ കേരളം മികച്ച പ്രകടനം കാഴ്ചവെച്ച സാങ്കേതിക മേഖല, ആരോഗ്യരംഗം, വിദ്യാഭ്യാസം, സുസ്ഥിര വികസനം, ഗ്രീൻ എനർജി, വ്യവസായ സൗഹൃദനയമായ ഈസ് ഓഫ് ഡൂയിങ് ബിസിനസ് എന്നിവയെല്ലാം പവലിയൻ ഒരുക്കാനുള്ള ആശയത്തിൽ ഉൾപ്പെടുത്തിയിട്ടുണ്ട്. 
രാജ്യാന്തര വ്യാപാരമേളയിൽ രുചിയുടെയും കരകൗശലത്തിന്റെയും വൈവിധ്യവുമായി  14 മുതൽ 18 വരെ 5 ബിസ്സിനെസ്സ് ദിനങ്ങളാണ് മേള ഇതിനോടകം വാൻ ജനപങ്കാളിത്തത്തോടെ പിന്നിട്ടത്.

ഉണക്കമീൻ മുതൽ വാട്ടു കപ്പ വരെയുള്ള ഭക്ഷ്യ വിഭവങ്ങളും മുളയിൽ തീർത്ത മ്യൂറലും ലാംപ് ഷേഡുകളും സ്പൈസ് ബോക്സും ബ്രാസ് പ്രൊപ്പല്ലറും അടക്കമുള്ള ഉത്പന്നങ്ങളും കേരള പവലിയനെ വേറിട്ടതാക്കുന്നു. കേരളത്തിന്റെ തനത് മസാലകളുംകറിക്കൂട്ടുകളും സുഗന്ധവ്യജ്ഞനങ്ങളും വേറെ, ഫാം ഇൻഫർമേഷൻ ബ്യൂറോയുടെ സ്റഅറാളിൽ താരം ചക്ക ഉത്പന്നങ്ങളാണ്. ചക്ക ബിസ്‌കറ്റ്, ചക്കപ്പുട്ടു പൊടി, ഡിബൈഡ്രേറ്റഡ് ചക്ക,പൈനാപ്പിൾ ഒപ്പം ഫാം ഉത്പന്നങ്ങളും ലഭ്യമാണ്. വ്യവസായ വാണിജ്യ വകുപ്പിൻെ സ്റ്റാളുകളിൽ കേരളത്തിലെ ജിയോഗ്രാഫിക്കൽ ഇൻഡിക്കേഷൻ (ജിഐ) ലഭിച്ച ഉത്പന്നങ്ങളുടെ വൻ നിരയാണ് ഒരുക്കിയിരിക്കുന്നത്.

കാർഷിക വികസന കർഷക ക്ഷേമ വകുപ്പിന്റെ നേതൃത്വത്തിൽ കർഷകൻ-വിപണി-സർക്കാർ പിന്തുണ വികസിത കേരളത്തിന്  എന്ന ആശയം ഉൾക്കൊണ്ടാണ് കൃഷി വകുപ്പിന്റെ  സ്റ്റാളുകൾ ഒരുക്കിയിരിക്കുന്നത്. കൃഷി വകുപ്പിന്റെ വിവിധ പദ്ധതികൾ, വികസന പ്രവർത്തനങ്ങൾ എന്നിവ ഈ ആശയത്തെ ആസ്പദമാക്കി വിശദീകരിച്ചിട്ടുണ്ട്. കൂടാതെ കേരളഗ്രോ, കേര ഫെഡ്, ആതിരപ്പള്ളി ട്രൈബൽ വാലി എന്നിവരുടെ വിൽപ്പന സ്റ്റാളുകളും സജീകരിച്ചിട്ടുണ്ട്. കർഷകർ ഉൽപാദിപ്പിച്ച കേരളത്തിന്റെ സുഗന്ധ വ്യഞ്ജനങ്ങൾക്ക് പ്രദർശന വില്പന സ്റ്റാളിൽ ആവശ്യക്കാർ ഏറെയാണ്. ആദ്യദിനം മുതലുള്ള വിലക്കിഴിവും കേരള പവലിയനിലേക്ക് ആളുകളെ ആകർഷിക്കുന്നു.ഹാൻഡ് വീവിലും, ഹാന്റെക്സിലും 20 % കിഴിവ്  ലഭ്യമാണ്. കുടുംബശ്രീ സാഫ് എന്നിവരുടെ ഫുഡ് സ്റ്റാളുകളിലും വൻ തിരക്കാണ്.

വാക്വം ഫ്രൈഡ് വാഴപ്പഴത്തിന്റെയും ചക്കപ്പഴത്തിന്റെയും ചിപ്സ്, ചക്ക ചപ്പാത്തി പൊടി, മുരിങ്ങയിലയും മറ്റ് ഔഷധ സസ്യങ്ങളും ചേർത്ത് പൊടിച്ച ചെറുധാന്യപ്പൊടി,  മുരിങ്ങ മണിച്ചോളം പായസം മിക്സ്, മഷ്റൂം കോഫി മുതൽ തഴപ്പായ വരെ ലഭ്യമാണ്. പ്ലാന്റേഷന്റെ സ്റ്റാളിൽ വിവിധ തരം ചായപ്പൊടികൾ, കോഫി, എലം, കുരുമുളക് എന്നിവ ലഭ്യമാണ്. കയർ വികസന വകുപ്പിന്റെ സ്റ്റാളിൽ ജിയോ ടെക്സ്റ്റൈയിൽസ്, ഗാർഡൻ ആർട്ടിക്കിൾസ്, ബ്രഷുകൾ, കയർ മെത്തകൾ മുതൽ ചെടിച്ചട്ടിയിൽ നിറയ്ക്കാനുള്ള ചകിരിച്ചോറ് വരെ ലഭ്യമാണ്. കേരഫെഡിന്റെ സ്റ്റാളിൽ തേങ്ങായുൽപ്പന്നങ്ങളുടെ വൻ നിരയാണ് ഒരുക്കിയിരിക്കുന്നത്. സഹകരണ വകുപ്പിന്റെ സ്റ്റാളിന്റെ മുഖ്യാകർഷണം വാട്ടിയ കപ്പയാണ്. ഒപ്പം അവലും ഉണക്ക ചക്കയും കാട്ടുമഞ്ഞളും സുഗന്ധവ്യജ്ഞനങ്ങളും ലഭിക്കും.

എസ്ടി ഡിപ്പാർട്ട്മെന്റ് സ്റ്റാളിൽ വനവിഭവങ്ങളായ തേൻ, സൈലന്റ്വാലി കോഫി, തിന,റാഗി,കമ്പ് റവ, ചാമ പൊടി, ജാതിപത്രി എന്നിവയ്ക്കാണ് ആവശ്യക്കാർ കൂടുതൽ. കുടുംബശ്രീയുടെ സ്റ്റാളിൽ ഹൽവ, അവലോസുണ്ട മുതൽ ഉപ്പേരി ഐറ്റംസ് വരെയുണ്ട്. ഉണങ്ങിയ പാവയ്ക്ക, കാന്താരി എന്നിവയും ലഭ്യം. ഹാൻവീവിലും ഹാന്റെക്സിലും വസ്ത്രങ്ങൾക്ക് 20ശതമാനം വിലകിഴിവ് ആരംഭിച്ചിട്ടുണ്ട്.  ഫിഷറീസ് സ്റ്റാളിൽ സോളാർ ഡ്രൈയിങ് ടെക്നോളജി ഉപയോഗിച്ച് ഉണക്കിയ മീനുകൾ ലഭ്യമാണ്. മീൻ അച്ചാറുകളും ഒട്ടേറെ. ഔഷധി, കേരള ആർട്സ് ആൻഡ് ക്രാഫ്റ്റ് വില്ലേജ്, കൈരളി, പഞ്ചായത്ത് വകുപ്പ്, കേരള സ്‌റ്റൈറ്റ് ബാംബു മിഷൻ, സാംസ്‌കാരിക വകുപ്പ്,മാർക്കറ്റ്ഫെഡ്, അതിരപ്പള്ളിയിലെ തനത് ഉത്പന്നങ്ങൾക്കുള്ള കൃഷി വകുപ്പ് എന്നിവയുടെ സ്റ്റാളുകളും ഉത്പന്നങ്ങളും കേരള പവലിയനിൽ ലഭ്യമാണ്.

സാംസ്‌കാരിക വകുപ്പ്, വ്യവസായ വാണിജ്യ വകുപ്പ്, ടൂറിസം വകുപ്പ്, ഹാന്റെക്സ്, പഞ്ചായത്ത് വകുപ്പ്, പട്ടികവർഗ്ഗ വികസന വകുപ്പ്,  ഔഷധി, ഹാൻവീവ് , ഹാന്റ് ലൂം & ടെക്സ്റ്റയിൽസ്, കോഓപറേറ്റീവ് സൊസൈറ്റി , മാർക്കറ്റ് ഫെഡ്, കുടുംബശ്രീ, പ്ലാന്റേഷൻ ഡയറക്ടറേറ്റ്, ഹാൻന്റി ക്രാഫ്റ്റ് ഡെവലപ്മെന്റ് കോർപ്പറേഷൻ   ( കൈരളി), ബാംബു വികസന കോർപ്പറേഷൻ, കയർ വികസന വകുപ്പ് , കേരഫെഡ്, അതിരപ്പള്ളി ഫാർമേഴ്സ് പ്രൊഡ്യൂസേഴ്സ് കമ്പനി, കൃഷി വകുപ്പ്, ഫാം ഇൻഫർമേഷൻ ബ്യൂറോ, കേരള ആഗ്രോ സ്റ്റോർ,  ഫിഷറീസ്(സാഫ്)  മത്സ്യഫെഡ് എന്നിവയാണ് അന്താരാഷ്ട്ര വ്യാപാര മേളയിൽ കേരള പവിലിയനിൽ അണിനിരക്കുന്നത്. സംസ്ഥാന ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പിന്റെ മേൽനോട്ടത്തിലാണ് പവലിയൻ ഒരുക്കിയിരിക്കുന്നത്.

അവസാനമായി അപ്ഡേറ്റ് ചെയ്തത് : 2024-11-20 11:37:58