സംസ്ഥാനത്തിന്റെ പൊതുഗതാഗത രംഗത്ത് കേരള സ്റ്റേറ്റ് റോഡ് ട്രാന്സ്പോര്ട്ട് കോര്പ്പറേഷന് നടത്തിവരുന്ന മുന്നേറ്റം വലുതാണ്. സര്ക്കാര് പിന്തുണയോടു കൂടി റെക്കോര്ഡ് വരുമാനം നേടുന്നതിനും യാത്രക്കാരുടെ എണ്ണത്തില് വര്ദ്ധനവ് വരുത്തുന്നതിനും കെഎസ്ആര്ടിസിക്ക് സാധിച്ചു. ചരിത്രത്തിലാദ്യമായി ഒരു ദിവസം 10.19 കോടി രൂപയുടെ ടിക്കറ്റ് വരുമാനം നേടി സര്വകാല റെക്കോര്ഡിട്ടു. പ്രതിദിന യാത്രക്കാരുടെ എണ്ണം 20 ലക്ഷത്തിലധികമായി ഉയര്ന്നു. ആധുനിക സൗകര്യങ്ങളോടു കൂടിയ പുത്തന് ബസ്സുകള് നിരത്തിലിറക്കി. സംസ്ഥാനത്തെ വിവിധ ബസ് സ്റ്റേഷനുകളുടെ അടിസ്ഥാന വികസനത്തിന്റെ ഭാഗമായി പ്രധാന സ്റ്റേഷനുകളുടെ നവീകരണ പ്രവര്ത്തനങ്ങള് ആരംഭിച്ചു. ഡ്രൈവിംഗ് സ്കൂളുകള്, പുതിയ ബഡ്ജറ്റ് ടൂറിസം പദ്ധതികള് എന്നിവ ആരംഭിച്ചതിലൂടെ കെഎസ്ആര്ടിസിക്ക് അധിക വരുമാനം നേടാനായി.
പൊതുഗതാഗ മാര്ഗ്ഗങ്ങളില് ഏറ്റവും കൂടുതല് ആളുകള് ഉപയോഗിക്കുന്നത് കെഎസ്ആര്ടിസി തന്നെയാണ്. 2025 ഓഗസ്റ്റ് വരെയുള്ള കണക്ക് അനുസരിച്ച് ആകെ 5087 പൊതുഗതാഗത ബസുകള് ഉണ്ട് ഇതില് 4625 ബസുകള് കെഎസ്ആര്ടിസിക്ക് കീഴിലുണ്ട്. 462 ബസുകള് കെ-സ്വിഫ്റ്റ് ലിമിറ്റഡിന് കീഴിലുള്ളതാണ്. നിലവില് ഓപ്പറേറ്റ് ചെയ്തുവരുന്ന പഴയ സൂപ്പര്ഫാസ്റ്റ് ബസുകള്, ലോ ഫ്ളോര് എസി ബസുകള് എന്നിവയ്ക്ക് പകരം ആകര്ഷകമായ ടിക്കറ്റ് നിരക്കില് സ്റ്റോപ്പുകള് കുറഞ്ഞ എന്നാല് ആധുനിക സൗകര്യങ്ങളുള്ള എ.സി പ്രീമിയം സൂപ്പര് ഫാസ്റ്റ് ബസ്സുകള് ആരംഭിച്ചു. ലിമിറ്റഡ് സ്റ്റോപ്പ് സര്വീസുകളും ഇലക്ട്രിക് ബസ്സുകളുടെ പുനക്രമീകരണം, ഭാഷ അറിയാത്ത യാത്രക്കാര്ക്ക് ബോര്ഡുകള് വായിക്കുന്നതിനു് ഡെസ്റ്റിനേഷന് നമ്പറിംഗ്, പുതിയ അന്തര്സംസ്ഥാന സര്വീസുകള് എന്നിവ മികച്ച യാത്രാ സൗകര്യം ഉറപ്പാക്കി.
തിരുവനന്തപുരം നഗരത്തിലെത്തുന്ന വിനോദ സഞ്ചാരികള്ക്ക് തുരന്ന ഇരുനില ബസില് നഗരം ചുറ്റിക്കാണിക്കാന് ഓപ്പണ് ഡബിള് ഡക്കര് ബസ്സുകള് എന്ന നിലയില് ആരംഭിച്ച പരിസ്ഥിതി സൗഹൃദ ഇലക്ട്രിക് ബസുകള് മൂന്നാറിലേക്കും എറണാകുളത്തേക്കും വ്യാപിപ്പിച്ചു. മൂന്നാറില് റോയല്വ്യൂ ഡബിള്ഡക്കര് എന്ന പേരില് സര്വീസ് ആരംഭിച്ച ബസിന് ഒരു ദിവസം 60,000 രൂപ വരെ വരുമാനം ലഭിക്കുന്നുണ്ട്.
പുരോഗമനപരമായ സംസ്ഥാന നയങ്ങളും പരിസ്ഥിതി സൗഹൃദമായ പൊതുജനങ്ങളുടെ കാഴ്ചപ്പാടുകളും ഇവി വാഹനങ്ങളുടെ ഉപയോഗത്തിലും സംസ്ഥാനത്തെ മുന്നിലെത്തിച്ചു. 2024 മുതല് 2025 ഓഗസ്റ്റ് വരെയുള്ള രജിസ്ട്രേഷന് കണക്ക് മാത്രം പരിശോധിച്ചാല് ആകെ 9399 ഇലക്ട്രിക് വാഹനങ്ങള് പൊതുഗതാഗത മേഖലയില് രജിസ്റ്റര് ചെയ്തിട്ടുണ്ട്. സര്ക്കാര് ഓഫീസുകളിലടക്കം ഇലക്ട്രിക് വാഹനങ്ങളുടെ ഉപയോഗം വലിയ രീതിയില് പ്രോത്സാഹിപ്പിക്കുന്നുണ്ട്.
സംസ്ഥാനത്തിന്റെ റോഡ് ഗതാഗതം പോലെ തന്നെ ആളുകള് ആശ്രയിക്കുന്ന ഗതാഗത സംവിധാനമാണ് റയില് ഗതാഗതവും. 1257 കിലോമീറ്റര് റൂട്ട് ദൈര്ഘ്യവും 1588 കിലോമീറ്റര് ട്രാക്കും ഉള്ക്കൊള്ളുന്നതാണ് കേരളത്തിന്റെ റെയില് ശൃംഖല. കൊച്ചി മെട്രോ റയിലും ലക്ഷക്കണക്കിന് യാത്രക്കാര് പ്രതിദിനം സേവനം ഉപയോഗിക്കുന്ന സംവിധാനമാണ്. ആലുവ മുതല് തൃപ്പുണിത്തുറ ടെര്മിനല് വരെയുള്ള ഫേസ് 1 (ബ്ലൂ ലൈന്) 28 കിലോമീറ്റര് പൂര്ത്തിയാക്കി പ്രവര്ത്തനം ആരംഭിച്ചതോടെ ഇന്ത്യയിലെ ഏറ്റവും വേഗത്തില് പൂര്ത്തീകരിക്കപ്പെട്ട മെട്രോ പദ്ധതികളില് ഒന്നായി മാറി. ഫെയ്സ് 2 (പിങ്ക് ലൈന്) നിര്മ്മാണം 2027 ഡിസംബറോടെ പൂര്ത്തിയാകും. 2024-25ല് 33.35 കോടി രൂപയുടെ പ്രവര്ത്തന ലാഭം കൈവരിക്കാന് കൊച്ചി മെട്രോ റയിലിന് കഴിഞ്ഞു.
2023 ഏപ്രില് പ്രവര്ത്തനം ആരംഭിച്ച കൊച്ചി വാട്ടര് മെട്രോ കേരളത്തിന്റെ ജലഗതാഗത സംവിധാനത്തിലെ സുപ്രധാന നാഴികക്കല്ലാണ്. അത്യാധുനികവും പരിസ്ഥിതി സൗഹൃദവുമായ ഇലക്ട്രിക് ഹൈബ്രിഡ് ബോട്ടുകള് ഉപയോഗിച്ചുള്ള ഇന്ത്യയിലെ തന്നെ വാട്ടര് മെട്രോ സംവിധാനമാണ് കൊച്ചിയിലേത്. ഉള്നാടന് ജലഗതാഗതത്തില് നിന്നുള്ള മൊത്ത വരുമാനം 813.55 ലക്ഷം രൂപയായി ഉയര്ന്നു. വിമാന ഗതാഗതത്തിലും കോവിഡ് കാലത്തിനു ശേഷമുണ്ടായ തകര്ച്ചയില് നിന്നുള്ള ശക്തമായ തിരിച്ചു വരവും വളര്ച്ചയും പ്രകടമാകുന്ന സ്ഥിതിയാണുള്ളത്.
