കേരള സർക്കാരിന്റെ ഭരണമികവിന്റെയും സാമൂഹിക നീതിയിലൂന്നിയ കാഴ്ചപ്പാടിന്റെയും ഉജ്ജ്വലമായ ഉദാഹരണമാണ് ട്രാൻസ്‌ജെൻഡർ വ്യക്തികളെ മുഖ്യധാരയിലേക്ക് കൊണ്ടുവരാനും അവരുടെ സാമൂഹികവും സാമ്പത്തികവുമായ ഉന്നമനത്തിനുമായി നടപ്പാക്കുന്ന സമഗ്ര പദ്ധതികൾ. ട്രാൻസ്‌ജെൻഡർ സമൂഹത്തോടൊപ്പം ചേർന്ന് നിൽക്കുകയും അവർക്ക് ആവശ്യമായ എല്ലാ പിന്തുണയും നൽകുകയും ചെയ്യുക എന്നത് ഈ സർക്കാരിന്റെ സുപ്രധാന നയങ്ങളിൽ ഒന്നാണ്.
ലിംഗമാറ്റ ശസ്ത്രക്രിയയ്ക്കും തുടർചികിത്സയ്ക്കുമായി ട്രാൻസ്‌ജെൻഡർ വ്യക്തികൾക്ക് 70,27,186 രൂപ അനുവദിച്ചത് ഈ വിഭാഗത്തിലുള്ളവരുടെ ആരോഗ്യപരമായ ആവശ്യങ്ങൾക്ക് വലിയൊരളവിൽ താങ്ങായി. സുരക്ഷിതമായ താമസ സൗകര്യമൊരുക്കുന്ന ഷോർട്ട് സ്റ്റേ ഹോമുകളുടെ പ്രവർത്തനങ്ങൾക്കായി 30,86,528 രൂപ ചെലവഴിച്ചു.വിദ്യാർത്ഥികൾക്കുള്ള സ്‌കോളർഷിപ്പുകൾക്കായി 4,15,000 രൂപയും ഹോസ്റ്റൽ സൗകര്യത്തിനായി 7,44,000 രൂപയും അനുവദിച്ചു. ട്രാൻസ്‌ജെൻഡർ ദമ്പതികൾക്കുള്ള വിവാഹ ധനസഹായമായ 60,000 രൂപ സാമൂഹിക അംഗീകാരത്തോടൊപ്പം സാമ്പത്തികപരമായ പിന്തുണയും നൽകുന്നു.
ട്രാൻസ്‌ജെൻഡർ വിഭാഗത്തിലെ 1357 പേർക്ക് വ്യക്തിഗത ഗുണഭോക്തൃ പദ്ധതികൾക്കായി 6.17 കോടി രൂപ അനുവദിച്ചത് അവരുടെ ജീവിത നിലവാരം ഉയർത്തുന്നതിനുള്ള സർക്കാരിന്റെ പ്രതിബദ്ധത വ്യക്തമാക്കുന്നു. ട്രാൻസ്‌ജെൻഡർ വ്യക്തികളുടെ കഴിവുകൾ പ്രോത്സാഹിപ്പിക്കുന്നതിനായി 'അനന്യം' എന്ന പേരിൽ ഒരു കലാട്രൂപ്പ് യാഥാർത്ഥ്യമാക്കിയത് അവരുടെ കലാപരമായ താല്പര്യങ്ങൾക്ക് ഒരു വേദി നൽകി.വിദൂര വിദ്യാഭ്യാസത്തിലൂടെ ഡിഗ്രി/പി.ജി കോഴ്സുകൾ പഠിക്കുന്നവർക്ക് വർഷം 24,000 രൂപ വരെ ധനസഹായം നൽകുന്ന 'വർണ്ണം' പദ്ധതി ഉന്നത വിദ്യാഭ്യാസം നേടാൻ ആഗ്രഹിക്കുന്ന ട്രാൻസ്‌ജെൻഡർ വ്യക്തികൾക്ക് ഏറെ പ്രയോജനകരമാണ്. തൊഴിൽ രംഗത്ത് അവർക്ക് മികച്ച അവസരങ്ങൾ ലഭ്യമാക്കുന്നതിനായി വിവിധ പരിശീലന പദ്ധതികൾ സർക്കാർ നടപ്പാക്കുന്നു. മത്സര പരീക്ഷകളിൽ പങ്കെടുക്കുന്നതിനുള്ള പരിശീലനത്തിന് സാമ്പത്തിക സഹായം നൽകുന്ന 'യത്നം' പദ്ധതിയും, അഭിരുചിക്കനുസരിച്ചുള്ള തൊഴിൽ പരിശീലനത്തിന് 'സാകല്യം' പദ്ധതിയും, തുടർവിദ്യാഭ്യാസം സാധ്യമാക്കുന്ന 'സമന്വയ' പദ്ധതിയും ട്രാൻസ്‌ജെൻഡർ വ്യക്തികളുടെ ശാക്തീകരണത്തിന് ഊർജ്ജം നൽകുന്നു. കലാപരമായ കഴിവുകൾ പ്രോത്സാഹിപ്പിക്കുന്നതിനായി 'വർണ്ണപ്പകിട്ട്' എന്ന പേരിൽ ഒരു ട്രാൻസ്‌ജെൻഡർ കലോത്സവം സംഘടിപ്പിച്ചു തുടങ്ങി ഇത് അവർക്ക് ഒരുമിച്ചു കൂടാനും തങ്ങളുടെ കഴിവുകൾ പ്രകടിപ്പിക്കാനും അവസരം നൽകുന്നു.
സർക്കാർ അവതരിപ്പിച്ച 'കരുതൽ' പദ്ധതിയിലൂടെ അടിയന്തിര ഘട്ടങ്ങളിൽ സഹായം നൽകുന്ന. ട്രാൻസ് വ്യക്തികളിലെ ആത്മഹത്യാ പ്രവണത, വിഷാദം, അമിത ഉത്കണ്ഠ എന്നിവ പ്രതിരോധിക്കുന്നതിന് പിയർ കൗൺസിലർമാർക്ക് പ്രത്യേക പരിശീലനം നൽകി ജില്ലകളിൽ സജ്ജമാക്കുന്ന പദ്ധതി ആരംഭിച്ചത് ഈ സമൂഹത്തിന്റെ മാനസികാരോഗ്യത്തിന് പ്രാധാന്യം നൽകുന്നു. സമൂഹത്തിൽ നിന്നും കുടുംബങ്ങളിൽ നിന്നും ട്രാൻസ്‌ജെൻഡർ വ്യക്തികൾ നേരിടുന്ന അതിക്രമങ്ങൾ, ലിംഗമാറ്റ ശസ്ത്രക്രിയയുമായി ബന്ധപ്പെട്ട പരാതികൾ, വ്യക്തികൾക്കിടയിൽ തന്നെയുള്ള പ്രശ്‌നങ്ങൾ എന്നിവയ്ക്ക് പരിഹാരം കാണുന്നതിനായി ഒരു ക്രൈസിസ് ഇന്റർവെൻഷൻ സെന്റർ സ്ഥാപിച്ചു.
ട്രാൻസ്‌ജെൻഡർ വ്യക്തികളുടെ സാമൂഹിക പുനരധിവാസത്തിനും പുരോഗതിക്കുമായുള്ള ബോധവൽക്കരണ പരിപാടികൾക്കായി നിയമ വിദഗ്ദ്ധർ, ഡോക്ടർമാർ, ജെൻഡർ വിഷയ വിദഗ്ദ്ധർ, ട്രാൻസ്‌ജെൻഡർ പ്രതിനിധികൾ എന്നിവരടങ്ങുന്ന ജില്ലാതല റിസോഴ്സ് പൂൾ രൂപീകരിച്ചു. പ്രകൃതിദുരന്തങ്ങൾ, അടിയന്തിര സാഹചര്യങ്ങൾ എന്നിവയെ പ്രതിരോധിക്കാൻ 30 ട്രാൻസ്‌ജെൻഡർ/ക്വിയർ വ്യക്തികൾക്ക് ദുരന്തനിവാരണ പരിശീലനം നൽകിയതും സ്വയംതൊഴിൽ വായ്പാ പദ്ധതിയുടെ ഭാഗമായി സംരംഭകത്വ പരിശീലനം നൽകിയതും അവരെ സ്വയംപര്യാപ്തരാക്കാൻ ലക്ഷ്യമിട്ടുള്ളതാണ്. വിവിധ പദ്ധതികളിലൂടെ ട്രാൻസ്‌ജെൻഡർ സമൂഹത്തെ സമൂഹത്തിന്റെ മുഖ്യധാരയിലേക്ക് ഉയർത്താനും അവർക്ക് അന്തസ്സോടെയും ആത്മാഭിമാനത്തോടെയും ജീവിക്കാനുള്ള സാഹചര്യം ഒരുക്കാനും സംസ്ഥാന സർക്കാർ പ്രത്യേക ശ്രദ്ധനൽകുന്നു.
