മാറുന്ന കാലത്തിന്റെ വെല്ലുവിളികളെ നേരിടാൻ സജ്ജമായി, സാങ്കേതിക മികവും ജനകീയ മുഖവുമുള്ള ഒരു പോലീസ് സേനയെ വാർത്തെടുക്കുന്നതിൽ കേരളം രാജ്യത്തിന് മാതൃകയാകുന്നു. പൗരന്മാരുടെ ജീവനും സ്വത്തിനും സുരക്ഷ ഉറപ്പാക്കുന്നതിനൊപ്പം, കുറ്റാന്വേഷണത്തിലും ക്രമസമാധാന പാലനത്തിലും അത്യാധുനിക സംവിധാനങ്ങൾ ഏകോപിപ്പിച്ചാണ് ആഭ്യന്തര വകുപ്പ് മുന്നോട്ട് പോകുന്നത്.
കുറ്റാന്വേഷണത്തിലും അഴിമതിരഹിതമായ സേവനത്തിലും കേരള പോലീസ് കൈവരിച്ച നേട്ടങ്ങൾ അന്താരാഷ്ട്ര തലത്തിൽ പോലും ശ്രദ്ധിക്കപ്പെടുന്നു. ഇന്ത്യൻ പോലീസ് ഫെഡറേഷന്റെ സർവ്വേ റിപ്പോർട്ട് പ്രകാരം അഴിമതിരഹിത പോലീസ് വിഭാഗത്തിൽ കേരളം രാജ്യത്ത് ഒന്നാം സ്ഥാനത്താണ്. ആഭ്യന്തര മന്ത്രാലയത്തിന്റെ റാങ്കിംഗിൽ രാജ്യത്തെ മികച്ച അഞ്ചാമത്തെ പോലീസ് സ്റ്റേഷനായി ആലത്തൂർ തിരഞ്ഞെടുക്കപ്പെട്ടു. തലശ്ശേരി, മുഹമ്മ, പണക്കാട് തുടങ്ങിയ സ്റ്റേഷനുകളുടെ മികവും ISO അംഗീകാരങ്ങളും സേനയുടെ കരുത്തിന്റെ തെളിവാണ്.
ഡിജിറ്റൽ യുഗത്തിലെ സൈബർ ഭീഷണികൾ നേരിടാൻ വിപുലമായ സംവിധാനങ്ങളാണ് പോലീസ് വകുപ്പ് ഒരുക്കിയിരിക്കുന്നത്. സൈബർ കുറ്റകൃത്യങ്ങൾ തടയുന്നതിനായി രൂപീകരിച്ച സൈബർഡോം, ഐ.ഐ.ടി പോലുള്ള സ്ഥാപനങ്ങളുമായി ചേർന്ന് അത്യാധുനിക സാങ്കേതിക വിദ്യകൾ വികസിപ്പിക്കുന്നു. ഡാർക്ക് വെബ് കുറ്റകൃത്യങ്ങൾ കണ്ടെത്താൻ 'Grapnel 1.0' എന്ന സോഫ്റ്റ്വെയർ വികസിപ്പിച്ചത് ഇതിന്റെ ഭാഗമാണ്.
രാജ്യത്ത് ആദ്യമായി ഡ്രോൺ ഫോറൻസിക് ലാബും ഗവേഷണ കേന്ദ്രവും സ്ഥാപിച്ച പോലീസ് ഏജൻസിയാണ് കേരള പോലീസ്. ഡ്രോൺ ആക്രമണങ്ങളെ തടയാൻ 'ഈഗിൾ ഐ' എന്ന മൊബൈൽ ആന്റി ഡ്രോൺ വെഹിക്കിളും സജ്ജമാക്കി. പോലീസ് സ്റ്റേഷനുകളെ ജനസൗഹൃദ കേന്ദ്രങ്ങളാക്കി മാറ്റുന്നതിനൊപ്പം സേവനങ്ങൾ സുതാര്യമാക്കാൻ ഡിജിറ്റൽ പോർട്ടലുകൾ സഹായിക്കുന്നു.
സിറ്റിസൺ സർവ്വീസ് പോർട്ടലായ 'തുണ', മൊബൈൽ ആപ്ലിക്കേഷനായ 'പോൽ ആപ്പ്' എന്നിവയിലൂടെ പരാതികൾ നൽകാനും മറ്റ് പോലീസ് സേവനങ്ങൾ ഓൺലൈനായി നേടാനും സാധിക്കുന്നു. സേവനങ്ങൾ സ്വീകരിച്ച ശേഷം വ്യക്തികൾക്ക് തങ്ങളുടെ അഭിപ്രായങ്ങളും പരാതികളും എസ്.എം.എസ് വഴി അറിയിക്കാനുള്ള സൗകര്യം നിലവിൽ വന്നു.
എല്ലാ ജില്ലകളിലും ഫോറൻസിക് സയൻസ് ലബോറട്ടറികൾ സ്ഥാപിച്ചു. ഇലക്ട്രോണിക് തെളിവുകൾ പരിശോധിക്കാൻ കേന്ദ്ര ഐ.ടി മന്ത്രാലയത്തിന്റെ അംഗീകാരമുള്ള രാജ്യത്തെ ചുരുക്കം ലാബുകളിൽ ഒന്നായി സംസ്ഥാന ഫോറൻസിക് ലാബ് മാറി. സാമ്പത്തിക തട്ടിപ്പുകൾ തടയാൻ 'ഇക്കണോമിക് ഒഫൻസസ് വിംഗ്' രൂപീകരിച്ചതും ഓൺലൈൻ തട്ടിപ്പുകൾ റിപ്പോർട്ട് ചെയ്യാൻ പ്രത്യേക കോൾ സെന്റർ ആരംഭിച്ചതും പൗരന്മാരുടെ സുരക്ഷ ഉറപ്പാക്കുന്നതിൽ നിർണ്ണായകമായി. നൂതന സാങ്കേതിക വിദ്യകളും മാനുഷികമായ സമീപനവും ഒരുപോലെ ചേർത്തുവെച്ച് കേരള പോലീസ് നവകേരളത്തിന്റെ കരുത്തുറ്റ കാവൽക്കാരായി മാറുകയാണ്.
