സർക്കാർ സേവനങ്ങൾക്കായി പൗരന്മാർ ഓഫീസുകൾ കയറിയിറങ്ങുന്ന കാലം മാറി, വിരൽത്തുമ്പിലൂടെ സാമ്പത്തിക ഇടപാടുകൾ പൂർത്തിയാക്കാൻ കഴിയുന്ന സുതാര്യമായ ഓൺലൈൻ പേയ്മെന്റ് സംവിധാനങ്ങൾ സംസ്ഥാനത്ത് വിപുലമാക്കിയിരിക്കുന്നു. സർക്കാർ ഖജനാവിലേക്കുള്ള പണമടയ്ക്കലുകൾ കൂടുതൽ ലളിതമാക്കുന്നതിനും അഴിമതിരഹിതമാക്കുന്നതിനും ഓൺലൈൻ സംവിധാനങ്ങൾ മുഖ്യപങ്ക് വഹിക്കുന്നു.
റവന്യൂ & രജിസ്ട്രേഷൻ വകുപ്പുകളിലെ ഒട്ടുമിക്ക പൊതുസേവനങ്ങളും സമ്പൂർണ ഡിജിറ്റൽ സംവിധാനത്തിലേക്ക് മാറിക്കഴിഞ്ഞു. സബ് രജിസ്ട്രാർ ഓഫീസുകൾ ഉൾപ്പെടെയുള്ള സുപ്രധാന സർക്കാർ സ്ഥാപനങ്ങളിൽ ഫീസുകൾ ഓൺലൈനായി അടയ്ക്കാനുള്ള സംവിധാനം നിലവിൽ വന്നു. ഇത് പണമിടപാടുകളിലെ സുതാര്യത വർദ്ധിപ്പിക്കുകയും ഇടനിലക്കാരുടെ ഇടപെടൽ ഒഴിവാക്കുകയും ചെയ്തു. ഒറ്റ ക്ലിക്കിൽ 39 ഓളം സേവനങ്ങളാണ് റവന്യുവകുപ്പ് നൽകുന്നത്. ജനന, മരണ, വിവാഹ രജിസ്ട്രേഷനുകൾ, കെട്ടിട പെർമിറ്റ്, സർട്ടിഫിക്കറ്റുകൾ ,സാക്ഷ്യപത്രങ്ങൾ, കെട്ടിടനികുതി തുടങ്ങിയവ ഓൺലൈനായി അടക്കാനുള്ള സൗകര്യം കെ-സ്മാർട്ടിലൊരുക്കിയിട്ടുണ്ട്. തദ്ദേശ സ്വയംഭരണ വകുപ്പിൽ കെ-സ്മാർട്ട് പോലുള്ള പ്ലാറ്റ്ഫോമുകൾ വഴി വസ്തുനികുതി ഉൾപ്പെടെയുള്ള വിവിധ നികുതികൾ വീട്ടിലിരുന്ന് തന്നെ അടയ്ക്കാൻ സാധിക്കുന്നു.
പ്രവാസി സേവനങ്ങൾക്കായി ഓൺലൈൻ രജിസ്ട്രേഷൻ സൗകര്യമുള്ള പ്രവാസി മിത്രം പോർട്ടൽ സഹായിക്കുന്നു. റേഷൻ കാർഡ് സംബന്ധമായ സേവനങ്ങൾക്കും മറ്റ് പൊതുവിതരണ സംവിധാനങ്ങൾക്കുമായി ഓൺലൈൻ പേയ്മെന്റ് ഏകോപിപ്പിച്ചു.
ഇന്റർനെറ്റ് ഒരു പൗരാവകാശമായി പ്രഖ്യാപിച്ച രാജ്യത്തെ ആദ്യ സംസ്ഥാനമായ കേരളം, കെ-ഫോൺ പദ്ധതിയിലൂടെ അതിവേഗ കണക്റ്റിവിറ്റി ഉറപ്പാക്കി. ഡിജിറ്റൽ പേയ്മെന്റ് സംവിധാനങ്ങൾ തടസ്സമില്ലാതെ സാധാരണക്കാരിലേക്ക് എത്താൻ കെ-ഫോൺ സഹായിക്കുന്നു. സർക്കാർ ഓഫീസുകൾ ഡിജിറ്റലായി ബന്ധിക്കപ്പെട്ടതോടെ ട്രഷറി ഇടപാടുകൾ മുതൽ ഓൺലൈൻ ചലാനുകൾ വരെയുള്ളവ തത്സമയം പൂർത്തിയാക്കാൻ സാധിക്കുന്നു.
ഇ-സാക്ഷരത നേടിയവർക്ക് നേരിട്ടും അല്ലാത്തവർക്ക് അക്ഷയ കേന്ദ്രങ്ങൾ വഴിയും നമ്മുടെ നാട്ടിൽ സർക്കാർ സേവനങ്ങൾ നേടിയെടുക്കാൻ ഇന്ന് സാധിക്കും. സർക്കാർ സേവനങ്ങൾ പൊതുജനങ്ങൾക്ക് കൂടുതൽ ലളിതവും സുതാര്യവും സമയബന്ധിതവുമാക്കി മാറ്റുന്നതിനും എല്ലാ വകുപ്പുകളുടെയും ഓൺലൈൻസേവനങ്ങൾ ഒരു കുടക്കീഴിൽ എന്ന ആശയത്തിലുമാണ് നമ്മുടെ കേരളം പോർട്ടൽ സർക്കാർ ഒരുക്കിയിരിക്കുന്നത്. ഇതിലൂടെ വൈദ്യുതി, വാട്ടർ അതോറിറ്റി, കെ-ഫോൺ പോലെയുള്ള സേവനങ്ങളുടെ ബില്ലുകൾ ഒടുക്കുന്നതിനുള്ള സൗകര്യം 'നമ്മുടെ കേരളം' ആപ്പിൽ ലഭ്യമാക്കി കഴിഞ്ഞു. ഗ്യാസ് ബുക്കിംഗ്, ഇന്റർനെറ്റ് സേവനങ്ങളുടെ ബിൽ പെയ്മെന്റ് തുടങ്ങിയവ കൂടി ചേർക്കുന്നതിനുള്ള നടപടികൾ സ്വീകരിച്ച് വരുന്നു.
സർക്കാർ ഓഫീസുകളിലെ വലിയ ക്യൂ ഒഴിവാക്കി സമയം ലാഭിക്കാൻ ഓൺലൈൻ പേയ്മെന്റ് സഹായിക്കുന്നു. ഇ-ഗവേണൻസ് ആപ്ലിക്കേഷനുകൾ വഴി നടത്തുന്ന ഇടപാടുകൾക്ക് ഉയർന്ന സുരക്ഷാ മാനദണ്ഡങ്ങളാണ് ഏർപ്പെടുത്തിയിരിക്കുന്നത്. സർക്കാർ സേവനങ്ങൾക്കായി ഇ-ട്രഷറി പോലുള്ള ഏകീകൃത പോർട്ടലുകൾ സജ്ജമാക്കിയത് വഴി ഏത് സമയത്തും എവിടെയിരുന്നും തുകയടയ്ക്കാനും രസീതുകൾ സ്വീകരിക്കാനും പൗരന്മാർക്ക് സാധിക്കുന്നു. ഡിജിറ്റൽ സാങ്കേതികവിദ്യയുടെ മുന്നേറ്റം ജനങ്ങളും സർക്കാരും തമ്മിലുള്ള ബന്ധം കൂടുതൽ ദൃഢമാക്കുകയും സേവന വിതരണത്തിൽ ദ്രുതവേഗത കൈവരിക്കാൻ സഹായിക്കുകയും ചെയ്യുന്നു.
