രാജ്യത്ത് ആദ്യമായി തദ്ദേശീയ സമൂഹത്തിൻറെ നേർകാഴ്ചകൾ ഒപ്പിയെടുത്ത നൂറു ഹ്രസ്വ ചലച്ചിത്രങ്ങളുമായി  കുടുംബശ്രീ  'കനസ് ജാഗ' ചലച്ചിത്രോത്സവം സംഘടിപ്പിക്കുന്നു. ഒക്ടോബർ 26,27 തീയതികളിൽ എറണാകുളം സെൻറ്തെരേസാസ് കോളേജിലാണ് ചലച്ചിത്രോത്സവം നടക്കുന്നത്. പട്ടികവർഗ പ്രത്യേക പദ്ധതി നടപ്പാക്കുന്ന പ്രദേശങ്ങളിലെ കുട്ടികൾ തയ്യാറാക്കിയ ഹ്രസ്വ ചലച്ചിത്രങ്ങളാണ് മേളയിൽ പ്രദർശിപ്പിക്കുന്നത്. കുട്ടികളുടെ സർഗവാസനകളെ പരിപോഷിപ്പിച്ചു കൊണ്ട് സാമൂഹികവും സാംസ്കാരികമായും മുന്നേറാൻ പ്രാപ്തരാക്കുകയാണ് കുടുംബശ്രീ ഇതിലൂടെ  ലക്ഷ്യമിടുന്നത്. കനസ് ജാഗ എന്നത് ഗോത്രഭാഷയിലുള്ള വാക്കാണ്.

തദ്ദേശീയ മേഖലയിലെ കുട്ടികളുടെ നേതൃത്വത്തിൽ ആശയ രൂപീകരണം, കഥ, തിരക്കഥ, ചിത്രീകരണം എന്നിവ ഉൾപ്പെടെ നിർവഹിച്ചു കൊണ്ട് ഹ്രസ്വ ചലച്ചിത്രങ്ങൾ നിർമിക്കുന്നതും പ്രദർശിപ്പിക്കുന്നതും രാജ്യത്ത് ആദ്യമായാണ്. പരിസ്ഥിതി, കാലാവസ്ഥാ വ്യതിയാനങ്ങൾ, സാമൂഹിക പ്രശ്നങ്ങൾ, കുട്ടികളുടെ അവകാശങ്ങൾ തുടങ്ങി വൈവിധ്യമാർന്ന പ്രമേയങ്ങൾ അടിസ്ഥാനമാക്കിയാണ് ഓരോ ചിത്രത്തിൻറെയും നിർമാണം. മൊബൈൽ ഫോണിൽ കുട്ടികൾ തന്നെയാണ് സിനിമ ചിത്രീകരിച്ചത്. ചിത്രങ്ങളുടെ എഡിറ്റിംഗ് നിർവഹണത്തിന് മാത്രമാണ് പുറമേ നിന്നുളള സാങ്കേതിക സഹായം ലഭിച്ചിട്ടുള്ളത്. 

ചലച്ചിത്രോത്സവത്തിനോടൊപ്പം ഹ്രസ്വ ചലച്ചിത്ര നിർമാണത്തിൻറെ ഭാഗമായി ഒമ്പത് പട്ടികവർഗ പ്രത്യേക പദ്ധതികളിലെ കുട്ടികൾ രചിച്ച കഥ, തിരക്കഥാ പുസ്തകങ്ങളുടെ പ്രകാശനം നടക്കും.  ആറളം (കണ്ണൂർ), വണ്ടാഴി, പറമ്പിക്കുളം (പാലക്കാട്), തിരുനെല്ലി, നൂൽപ്പുഴ (വയനാട്), നിലമ്പൂർ (മലപ്പുറം), ഇടമലക്കുടി, മറയൂർ - കാന്തല്ലൂർ (ഇടുക്കി), മലപണ്ടാരം (പത്തനംതിട്ട), കൊറഗ (കാസർഗോഡ്), കാടർ (തൃശ്ശൂർ), അട്ടപ്പാടി പദ്ധതികളുടെ ഭാഗമായി 3000ത്തോളം കുട്ടികൾ കനസ് ജാഗ പുസ്തകങ്ങൾ തയാറാക്കുന്ന പ്രവർത്തനങ്ങളുടെ ഭാഗമായി.

ഹ്രസ്വ ചലച്ചിത്ര നിർമാണത്തിൻറെ മുന്നോടിയായി ഇതുമായി ബന്ധപ്പെട്ട് മുപ്പത് മുതൽ അമ്പത് വരെ കുട്ടികളെ ഉൾപ്പെടുത്തി നൂറോളം പരിശീലന ക്യാമ്പുകൾ സംഘടിപ്പിച്ചു. തുടർന്ന് ഓരോ ബാച്ചിൽ നിന്നും ഓരോ ഹ്രസ്വചിത്രം വീതം തയ്യാറാക്കി. കഥ, തിരക്കഥാ രചന എന്നിവയ്ക്ക് ഈ രംഗത്തെ വിദഗ്ധരുടെ പിന്തുണയും പരിശീലന പരിപാടിയിൽ ലഭ്യമാക്കിയിരുന്നു.

ആകെ അഞ്ചു വേദികളിലായായി സംഘടിപ്പിക്കുന്ന പരിപാടിയിൽ നാലു വേദികളിൽ ഹ്രസ്വചലച്ചിത്ര പ്രദർശനവും ഒരു വേദിയിൽ സെമിനാറും സംഘടിപ്പിക്കും. സമൂഹത്തിൻറെ വിവിധ മേഖലകളിൽ നിന്നുള്ള വിദഗ്ധർ സെമിനാറുകളിൽ പങ്കെടുക്കും. ഹ്രസ്വ ചലച്ചിത്രങ്ങൾ ആസ്വദിക്കുന്നതിനും സെമിനാറുകളിൽ പങ്കെടുക്കുന്നതിനും പൊതു ജനങ്ങൾക്കും അവസരമുണ്ട്. ഹ്രസ്വ ചലച്ചിത്രങ്ങൾ തയ്യാറാക്കിയ അഞ്ഞൂറോളം കുട്ടികളും അനിമേറ്റർമാർ, ബ്രിഡ്ജ് സ്കൂൾ അധ്യാപകർ എന്നിവർ ഉൾപ്പെടെ ആകെ രണ്ടായിരത്തോളം പേർ ഇതിൻറെ ഭാഗമാകും. തദ്ദേശീയ മേഖലയിൽ കുടുംബശ്രീയുടെ ഫീൽഡ്തല പ്രവർത്തനങ്ങൾ നടപ്പാക്കുന്ന അനിമേറ്റർമാർ, അനിമേറ്റർ കോർഡിനേറ്റർമാർ, കുട്ടികളുടെ വിദ്യാഭ്യാസ പ്രവർത്തനങ്ങൾക്ക് പിന്തുണ നൽകുന്ന ബ്രിഡ്ജ് കോഴ്സ് അധ്യാപകർ എന്നിവരുടെ സംസ്ഥാനതല സംഗമവും മേളയിൽ സംഘടിപ്പിക്കും. ഐക്യ രാഷ്ട്ര സംഘടന, ടാലൻറ് ബുക്ക് ഓഫ് വേൾഡ് റെക്കോഡ്സ് എന്നിവയുടെ പ്രതിനിധികളും മേളയുടെ ഭാഗമാകും.

അവസാനമായി അപ്ഡേറ്റ് ചെയ്തത് : 2024-10-23 10:17:25