സ്ത്രീകളുടെ സാമ്പത്തിക സുരക്ഷയും സാമൂഹിക ക്ഷേമവും ഉറപ്പാക്കി അവരെ സ്വയംപര്യാപ്തരാക്കുക എന്ന ലക്ഷ്യത്തോടെ സംസ്ഥാന സർക്കാർ നടപ്പിലാക്കുന്ന പദ്ധതിയാണ് 'സ്ത്രീ സുരക്ഷാ പദ്ധതി'. സാമ്പത്തികമായി പിന്നാക്കം നിൽക്കുന്ന സ്ത്രീകൾക്കും ട്രാൻസ് വുമൺ വിഭാഗത്തിലുള്ളവർക്കും പ്രതിമാസം 1000 രൂപ ധനസഹായം നൽകുന്ന ഈ പദ്ധതി, സ്ത്രീകളുടെ ആത്മാഭിമാനവും ആത്മവിശ്വാസവും ഉയർത്തുന്നതിനായുള്ള നിർണായക ഇടപെടലാണ്.
സാമ്പത്തിക പരാശ്രിതത്വം സ്ത്രീകളെ നിശബ്ദരാക്കുന്ന സാഹചര്യം ഒഴിവാക്കുകയാണ് പദ്ധതിയുടെ ലക്ഷ്യം. അർഹരായ ഗുണഭോക്താക്കൾക്ക് പ്രതിമാസം 1,000 രൂപ നേരിട്ട് ബാങ്ക് അക്കൗണ്ടുകളിലേക്ക് ലഭ്യമാക്കുന്നു. പദ്ധതിയുടെ സംസ്ഥാനതല ഉദ്ഘാടനം കഴിഞ്ഞ് മണിക്കൂറുകൾക്കുള്ളിൽ തന്നെ പത്തു ലക്ഷത്തിലധികം (10,18,042) ഗുണഭോക്താക്കളുടെ അക്കൗണ്ടുകളിൽ തുക ലഭ്യമാക്കിക്കൊണ്ട് സർക്കാർ ഈ ദൗത്യത്തിലെ കാര്യക്ഷമത തെളിയിച്ചു കഴിഞ്ഞു.
കേരളത്തിൽ സ്ഥിരതാമസക്കാരായ 35 വയസ്സിനും 60 വയസ്സിനും ഇടയിൽ പ്രായമുള്ള സ്ത്രീകൾ, സാമ്പത്തികമായി പിന്നാക്കം നിൽക്കുന്ന സ്ത്രീകൾക്കും ട്രാൻസ് വുമൺ വിഭാഗത്തിൽപ്പെട്ടവർക്കും മുൻഗണന. അന്ത്യോദയ അന്നയോജന (മഞ്ഞ കാർഡ്), മുൻഗണനാ വിഭാഗം (പിങ്ക് കാർഡ്) എന്നിവയുള്ളവർ. മറ്റ് സാമൂഹിക ക്ഷേമ പെൻഷനുകളോ (വിധവ, അവിവാഹിത, വികലാംഗ പെൻഷനുകൾ), സർവീസ്/കുടുംബ പെൻഷനുകളോ ലഭിക്കാത്തവർക്കായിരിക്കും ഈ ആനുകൂല്യം.
തദ്ദേശ സ്വയംഭരണ വകുപ്പ് മുഖേന തികച്ചും സുതാര്യമായാണ് പദ്ധതി നടപ്പാക്കുന്നത്. ഓൺലൈൻ അപേക്ഷ: ksmart.lsgkerala.gov.in എന്ന വെബ്സൈറ്റ് വഴി ബന്ധപ്പെട്ട തദ്ദേശ സ്വയംഭരണ സ്ഥാപനങ്ങളിലെ സെക്രട്ടറിമാർക്കാണ് അപേക്ഷ സമർപ്പിക്കേണ്ടത്.
പ്രായം തെളിയിക്കുന്ന രേഖ (ജനന സർട്ടിഫിക്കറ്റ്/സ്കൂൾ സർട്ടിഫിക്കറ്റ്/ലൈസൻസ്/പാസ്പോർട്ട്), ബാങ്ക് അക്കൗണ്ട് വിവരങ്ങൾ, ആധാർ കാർഡ്, സ്വയം സാക്ഷ്യപ്പെടുത്തിയ സത്യപ്രസ്താവന എന്നിവയോട് കൂടിയാണ് പദ്ധതിക്കായി അപേക്ഷിക്കേണ്ടത്. ആനുകൂല്യം തുടർച്ചയായി ലഭിക്കുന്നതിന് എല്ലാ വർഷവും ആധാർ അധിഷ്ഠിത വാർഷിക മസ്റ്ററിംഗ് നടത്തേണ്ടതുണ്ട്.
ജെൻഡർ ബജറ്റിംഗ്, കുടുംബശ്രീ ശാക്തീകരണം, ഭരണനിർവ്വഹണത്തിലെ 50 ശതമാനം സംവരണം, തുല്യവേതനം തുടങ്ങി സർക്കാർ നടപ്പിലാക്കി വരുന്ന നിരവധി സ്ത്രീസൗഹൃദ നടപടികളുടെ തുടർച്ചയായാണ് ഈ പദ്ധതി. സ്ത്രീകളുടെ സാമ്പത്തിക സുരക്ഷിതത്വം കൂടി ഉറപ്പാക്കി തലയുയർത്തി ജീവിക്കാൻ ഓരോ സ്ത്രീയെയും പ്രാപ്തയാക്കുകയാണ് ഇതിലൂടെ സർക്കാർ. സന്ദർശിക്കുക: ksmart.lsgkerala.gov.in
