ലൈഫ് മിഷൻ: നവകേരളത്തിന്റെ കരുതലായി സമ്പൂർണ്ണ പാർപ്പിട പദ്ധതി

കേരളത്തിലെ എല്ലാ ഭൂരഹിതരായ ഭവനരഹിതർക്കും സുരക്ഷിതവും മാന്യവുമായ പാർപ്പിടം ഉറപ്പാക്കുക എന്ന ലക്ഷ്യത്തോടെ സംസ്ഥാന സർക്കാർ നടപ്പിലാക്കുന്ന മുൻനിര പദ്ധതിയാണ് ലൈഫ് മിഷൻ (Livelihood Inclusion and Financial Empowerment). സ്വന്തമായി വീടുവയ്ക്കാൻ ശേഷിയില്ലാത്തവർക്ക് തലചായ്ക്കാൻ ഒരിടം നൽകുന്നതിനൊപ്പം, അവരെ സാമൂഹികവും സാമ്പത്തികവുമായി ശാക്തീകരിക്കുക എന്ന വിശാലമായ ദർശനമാണ് ഈ പദ്ധതിക്ക് പിന്നിലുള്ളത്.

കേരളത്തിന്റെ പാർപ്പിട രംഗത്ത് ചരിത്രം കുറിച്ചുകൊണ്ട് ലൈഫ് മിഷനിലൂടെ ഇതുവരെ അഞ്ച് ലക്ഷം വീടുകളുടെ നിർമ്മാണം പൂർത്തീകരിച്ചു. നിശ്ചിത സമയപരിധിക്കുള്ളിൽ ഇത്രയധികം വീടുകൾ പൂർത്തിയാക്കി എന്നതും, 2026 ഫെബ്രുവരി വരെ ഏകദേശം 20,831.60 കോടി രൂപ ഈ പദ്ധതിക്കായി ചെലവഴിച്ചു എന്നതും ശ്രദ്ധേയമാണ്.

സമൂഹത്തിലെ വിവിധ വിഭാഗങ്ങളിലായി പാർപ്പിട പ്രതിസന്ധി അനുഭവിക്കുന്നവരെ നാല് പ്രധാന വിഭാഗങ്ങളായി തിരിച്ചാണ് പദ്ധതി ഗുണഭോക്താക്കളെ കണ്ടെത്തുന്നത്. 

ഭൂമിയുള്ള ഭവനരഹിതർ

ഭവനനിർമ്മാണം പൂർത്തിയാക്കാത്തവർ അല്ലെങ്കിൽ വാസയോഗ്യമല്ലാത്ത ഭവനം ഉള്ളവർ.

പുറമ്പോക്കിലോ, തീരദേശ മേഖലയിലോ, തോട്ടം മേഖലയിലോ താത്കാലിക ഭവനങ്ങളിൽ കഴിയുന്നവർ.

സ്വന്തമായി ഭൂമിയോ വീടോ ഇല്ലാത്തവർ.

കാര്യക്ഷമതയുടെ കാര്യത്തിൽ രാജ്യത്തിന് തന്നെ മാതൃകയായ ഈ പദ്ധതിയെ നീതി ആയോഗ് മികച്ച രീതിയിലുള്ള പ്രവർത്തനമായി അംഗീകരിച്ചിട്ടുണ്ട്. ഓരോ സാധാരണ കുടുംബത്തിനും 4 ലക്ഷം രൂപയും പട്ടികവർഗ്ഗ കുടുംബങ്ങൾക്ക് 6 ലക്ഷം രൂപയുമാണ് സർക്കാർ ഭവന നിർമ്മാണത്തിനായി നൽകുന്നത്.

പൂർത്തീകരിക്കാത്ത വീടുകളുടെ പണി തീർക്കൽ, ഭൂമിയുള്ളവർക്ക് ധനസഹായം, ഭൂരഹിതർക്കായി ഭവന സമുച്ചയങ്ങൾ, പഴയ വീടുകളുടെ നവീകരണം എന്നിങ്ങനെ ശാസ്ത്രീയമായ നാല് ഘട്ടങ്ങളിലായാണ് മിഷൻ പ്രവർത്തിക്കുന്നത്. ലൈഫ് മിഷൻ കേവലം ഒരു ഭവന നിർമ്മാണ പദ്ധതിയല്ല, മറിച്ച് ഒരു പുനരധിവാസ ദൗത്യമാണ്. വീട് നൽകുന്നതിനൊപ്പം തന്നെ ഗുണഭോക്താക്കൾക്ക് സ്വയം തൊഴിൽ ചെയ്യുന്നതിനും മാന്യമായ ഉപജീവനം കണ്ടെത്തുന്നതിനുമുള്ള സഹായങ്ങൾ നൽകുന്നു. സാമൂഹിക ക്ഷേമ പദ്ധതികളുടെയും സാമ്പത്തിക സേവനങ്ങളുടെയും പ്രയോജനം എല്ലാ ഗുണഭോക്താക്കളിലേക്കും കേന്ദ്രീകരിക്കാൻ പദ്ധതി ഊന്നൽ നൽകുന്നു.

മുഖ്യമന്ത്രി അദ്ധ്യക്ഷനും തദ്ദേശ സ്വയംഭരണ വകുപ്പ് മന്ത്രി സഹ അദ്ധ്യക്ഷനുമായ സംസ്ഥാനതല പാർപ്പിട മിഷനാണ് പദ്ധതിയുടെ മേൽനോട്ടം വഹിക്കുന്നത്. സുരക്ഷിതമായ പാർപ്പിടം എന്നത് ഓരോ പൗരന്റെയും അവകാശമായി കണ്ട്, ആർക്കും പാർപ്പിടമില്ലാത്ത ഒരു കേരളം കെട്ടിപ്പടുക്കാനുള്ള ജനകീയ ദൗത്യം തന്നെയാണ് ലൈഫ് മിഷൻ. സന്ദർശിക്കുക: www.lifemission.kerala.gov.in