കേരളത്തിന്റെ പൊതുജനാരോഗ്യ സംവിധാനത്തെ ലോകനിലവാരത്തിലേക്ക് ഉയർത്തുക എന്ന ലക്ഷ്യത്തോടെ സംസ്ഥാന സര്ക്കാര് ആരോഗ്യരംഗത്തെ സമഗ്ര സേവനങ്ങളെ ഉള്പ്പെടുത്തി തയ്യാറാക്കുന്ന പദ്ധതിയാണ് 'ആർദ്രം മിഷൻ'. നിലവിൽ രാജ്യത്തെ ഏറ്റവും മികച്ച പൊതുജനാരോഗ്യ സംവിധാനമുള്ള കേരളത്തിൽ, അത്യാധുനിക ചികിത്സാ സൗകര്യങ്ങളും ജനസൗഹൃദ സേവനങ്ങളും ഗ്രാമതലങ്ങളിൽ വരെ ലഭ്യമാക്കുക എന്നതാണ് ഈ പദ്ധതിയുടെ ലക്ഷ്യം.
ആർദ്രം മിഷന്റെ ഏറ്റവും വലിയ നേട്ടം താഴെത്തട്ടിലുള്ള പ്രാഥമികാരോഗ്യ കേന്ദ്രങ്ങളെ (PHC) കുടുംബാരോഗ്യ കേന്ദ്രങ്ങളായി (FHC) മാറ്റിയതാണ്. ഭൗതിക സാഹചര്യങ്ങൾ മെച്ചപ്പെടുത്തുന്നതിനൊപ്പം പ്രൊമോട്ടീവ്, പ്രിവന്റീവ്, റിഹാബിലിറ്റേറ്റീവ്, ക്യൂറേറ്റീവ് ചികിത്സാ രീതികൾ സമന്വയിപ്പിച്ചുകൊണ്ടുള്ള സമഗ്ര ആരോഗ്യ മാതൃകയാണ് ആർദ്രം വിഭാവനം ചെയ്യുന്നത്.
ആരോഗ്യ മേഖലയില് അനുയോജ്യവും സമഗ്രവുമായ സൗകര്യങ്ങള് ഉറപ്പാക്കുക, സംരക്ഷണം, പ്രതിരോധം, ചികിത്സ, പുനരധിവാസം, സാന്ത്വന പരിചരണം എന്നിവ അര്ഹിക്കുന്ന എല്ലാ വിഭാഗങ്ങള്ക്കും ലഭ്യമാക്കുക, പകര്ച്ചവ്യാധി രോഗ നിയന്ത്രണ നിര്മ്മാര്ജ്ജന പ്രവര്ത്തനങ്ങള് നടപ്പാക്കുക, മാതൃ-ശിശു സേവനങ്ങളുടെ ശാക്തീകരണം തുടങ്ങിയവയാണ് പദ്ധതിയിലൂടെ വിഭാവനം ചെയ്യുന്നത്.
ലക്ഷ്യങ്ങൾ :
പ്രാഥമികാരോഗ്യ കേന്ദ്രങ്ങളെ കൂടുതൽ സൗകര്യങ്ങളുള്ള കുടുംബാരോഗ്യ കേന്ദ്രങ്ങളായി പരിവർത്തിപ്പിക്കുക.
മികച്ച ഡോക്ടർമാരുടെയും പാരാ മെഡിക്കൽ സ്റ്റാഫിന്റെയും സേവനം ഉറപ്പാക്കുക.
അത്യാധുനിക സൗകര്യങ്ങളോടെ ഒ.പി. വിഭാഗങ്ങൾ നവീകരിക്കുക.
ശുചിത്വമുള്ള വാർഡുകൾ, മുറികൾ, കിടക്കകൾ, ശൗചാലയങ്ങൾ എന്നിവ സജ്ജമാക്കുക.
ആശുപത്രികളിൽ നിന്ന് തന്നെ ജീവൻരക്ഷാ മരുന്നുകൾ മിതമായ നിരക്കിലോ സൗജന്യമായോ ലഭ്യമാക്കുക.
പൊതുജനാരോഗ്യ സംവിധാനത്തിന്റെ പ്രവർത്തനം സുതാര്യമാക്കാൻ ആർദ്രം മിഷൻ ഡിജിറ്റൽ സാങ്കേതികവിദ്യയെ ഫലപ്രദമായി ഉപയോഗിക്കുന്നു. വെബ് അധിഷ്ഠിത അപ്പോയിന്റ്മെന്റ് സിസ്റ്റം, വിർച്വൽ ക്യൂ സംവിധാനങ്ങൾ എന്നിവ ഉൾപ്പെടുന്ന ഇ-ഹെൽത്ത് സംവിധാനം നടപ്പിലാക്കി.
രജിസ്ട്രേഷൻ കേന്ദ്രങ്ങളിൽ പേഷ്യന്റ് റിസപ്ഷൻ, വൈ-ഫൈ സൗകര്യത്തോടുകൂടിയ വെയ്റ്റിംഗ് റൂമുകൾ എന്നിവ സജ്ജമാക്കി. വിദഗ്ദ്ധ ഡോക്ടർമാരുടെ സേവനം ഗ്രാമപ്രദേശങ്ങളിൽ ലഭ്യമാക്കാൻ കുടുംബാരോഗ്യ കേന്ദ്രങ്ങളിൽ ടെലിമെഡിസിൻ സൗകര്യങ്ങൾ ഒരുക്കിയിട്ടുണ്ട്.
സമൂഹത്തിലെ സാധാരണക്കാരിലും ദരിദ്രവിഭാഗങ്ങളിലും മികച്ച ചികിത്സാ സൗകര്യങ്ങൾ എത്തിക്കുക എന്ന സർക്കാരിന്റെ നിശ്ചയദാർഢ്യത്തിന്റെ അടയാളമാണ് ആർദ്രം മിഷൻ. സന്ദർശിക്കുക: www.arogyakeralam.gov.in
