കേരളത്തിന്റെ സാമ്പത്തിക വളർച്ചയെ ഉത്തേജിപ്പിക്കുന്നതിനായി 'സംരഭക  വർഷം' പദ്ധതിക്ക് വ്യവസായ വകുപ്പ് രൂപം നൽകി. സംരംഭകർ ഓഫീസുകൾ കയറിയിറങ്ങേണ്ടിയിരുന്ന സാഹചര്യം പൂർണമായും  ഒഴിവാക്കി വ്യവസായവകുപ്പ് സംരംഭകരെ മികച്ച സാദ്ധ്യതകൾ പ്രധാനം ചെയ്യുന്ന പദ്ധതിയാണ് ഇത്.അതിന്റെ ഭാഗമായി 2022–23 സാമ്പത്തികവർഷം സംരംഭക വർഷമായി സർക്കാർ പ്രഖ്യാപിക്കുകയാണ്. ഒരു ലക്ഷം സംരംഭമാണ് ഈ സംരംഭക വർഷത്തിൽ സർക്കാർ ലക്ഷ്യംവയ്ക്കുന്നത്. ഇതിനായി ശാസ്‌ത്രീയമായ കർമപദ്ധതിയും വ്യക്തമായ കലണ്ടറും പ്രൊഫഷണലായ നിർവഹണ സംവിധാനവും തയ്യാറാക്കിയിട്ടുണ്ട്.

വിവിധ വകുപ്പുകളും പ്രാദേശിക സർക്കാരുകളും സമൂഹവും ഒറ്റക്കെട്ടായി ഏറ്റെടുത്ത് പൂർത്തീകരിക്കേണ്ട വലിയൊരു വികസന ദൗത്യമാണ് ഇത്. അഭ്യസ്‌തവിദ്യരായ യുവതീയുവാക്കൾക്ക് തൊഴിൽ നൽകുന്നതിനും സംസ്ഥാനത്തിന്റെ ആഭ്യന്തര വരുമാനം വർധിപ്പിക്കുന്നതിനും വ്യവസായവൽക്കരണം അനിവാര്യമാണ്.  വ്യവസായം, തദ്ദേശഭരണം, സഹകരണം, കൃഷി, ഫിഷറീസ്, മൃഗസംരക്ഷണം, ടൂറിസം, തൊഴിൽ, ധന വകുപ്പുകൾ ഏകോപിതമായാണ് സംരംഭക വർഷത്തിന് നേതൃത്വം നൽകുന്നത്. മറ്റു സംസ്ഥാനങ്ങളിലെ ചെറുകിട വ്യവസായങ്ങളെ ആശ്രയിക്കുന്ന മേഖലകൾ കണ്ടെത്തി അതിനു പകരമായി കേരളത്തിൽത്തന്നെ സംരംഭങ്ങൾ ആരംഭിക്കുന്നതിന് വേണ്ട സംവിധാനങ്ങൾ ഈ പദ്ധതിയിലൂടെ സാധ്യമാകും. ഗവേഷണ ഫലങ്ങൾ വാണിജ്യപരമായി ഉൽപ്പാദിപ്പിക്കുന്നതിനുള്ള പിന്തുണ കേന്ദ്ര ഗവേഷണ സ്ഥാപനങ്ങളുടെ പിൻബലം സംരഭങ്ങൾക്ക് ഉണ്ടാവും. . 

മലിനീകരണ നിയന്ത്രണ ബോർഡിന്റെ റെഡ് കാറ്റഗറിയിൽപ്പെടാത്തതും അമ്പതു കോടി രൂപവരെയുള്ളതുമായ  നിക്ഷേപങ്ങൾക്ക് ലൈസൻസ് ഇല്ലാതെ പ്രവർത്തിക്കുന്നതിനുള്ള നിയമം ഇപ്പോൾ നിലവിലുണ്ട്. ഏകജാലക സംവിധാനംവഴി രജിസ്റ്റർ ചെയ്താൽ മൂന്നു വർഷംവരെ അക്നോളജ്മെന്റ്‌ രസീത്   വഴി പ്രവർത്തിക്കാം. ഇതു ലൈസൻസിനു തുല്യമായി ബാങ്കുകളും സർക്കാർ വകുപ്പുകളും അംഗീകരിച്ചിട്ടുണ്ട്. അമ്പതു കോടി രൂപയ്‌ക്ക് മുകളിലുള്ള സംരംഭങ്ങളാണെങ്കിൽ എല്ലാ രേഖകളോടുംകൂടി അപേക്ഷ സമർപ്പിച്ചാൽ ഏഴു ദിവസത്തിനകം ലൈസൻസ് നൽകണമെന്ന വ്യവസ്ഥയുള്ള നിയമം പാസാക്കി. വ്യവസായം ആരംഭിക്കുന്നതുമായോ നടത്തിക്കൊണ്ടു പോകുന്നതുമായോ ബന്ധപ്പെട്ട സേവനങ്ങളെ സംബന്ധിച്ച പരാതി 30 ദിവസത്തിനകം പരിഹരിക്കുന്നതിനുള്ള പരാതി പരിഹാര കമ്മിറ്റി ജില്ലാ, സംസ്ഥാന തലങ്ങളിൽ നിയമ പിന്തുണയോടെ രൂപീകരിച്ചു. ഈ സമിതിയുടെ തിരുമാനങ്ങൾ ബന്ധപ്പെട്ട വകുപ്പിലെ ഉദ്യോഗസ്ഥർ 15 ദിവസത്തിനകം നടപ്പാക്കിയില്ലെങ്കിൽ പിഴ ഈടാക്കാനും അച്ചടക്ക നടപടി ശുപാർശ ചെയ്യാനും സമിതിക്ക് അധികാരമുണ്ട്. പൂർണമായും ഓൺലൈനിലാക്കുന്ന സോഫ്റ്റ്‌വെയറും ഏപ്രിലിൽ പ്രാവർത്തികമാക്കും. വ്യവസായശാലകളിലെ പരിശോധനകളെല്ലാം സോഫ്റ്റ്‌വെയർ അധിഷ്ഠിത സംവിധാനത്തിലേക്ക് മാറ്റി സുതാര്യമാക്കി. സ്വകാര്യ വ്യവസായ എസ്റ്റേറ്റുകളുടെ സർക്കാർ ഉത്തരവ് കാലോചിതമാക്കി പുതുക്കുന്നതിനും നിശ്ചയിച്ചിട്ടുണ്ട്. കാലഹരണപ്പെട്ടതോ പ്രായോഗികമല്ലാത്തതോ ആയ വകുപ്പുകളും ചട്ടങ്ങളും പഠിച്ച് റിപ്പോർട്ട് നൽകാൻ ചുമതലപ്പെടുത്തിയ കമീഷൻ റിപ്പോർട്ട് സമയബന്ധിതമായി സമർപ്പിച്ചു. 

സംരംഭക വർഷത്തിലെ പ്രവർത്തനങ്ങൾക്ക് അനുസൃതമായി വകുപ്പിനെയും പുതുക്കിപ്പണിയുകയാണ്. ഉദ്യോഗസ്ഥർക്ക് കോഴിക്കോട് ഐഐഎമ്മിലും അഹമ്മദാബാദിലെ ദേശീയ സംരംഭകത്വ വികസന ഇൻസ്റ്റിറ്റ്യൂട്ടിലുമായി(ഇഡിഐഐ) ത്രിദിന പരിശീലന പദ്ധതി നടപ്പാക്കി. താലൂക്ക് വ്യവസായ ഓഫീസുകളെല്ലാം ഫെസിലിറ്റേഷൻ കേന്ദ്രങ്ങളാക്കിമാറ്റി. 59 പേർ താലൂക്കുതല റിസോഴ്സ് ഓഫീസർമാരായി പ്രവർത്തിക്കും.
പഞ്ചായത്തുതല പ്രവർത്തനങ്ങൾക്കായി ബിടെക്, എംബിഎ ബിരുദധാരികളായ 1155 പേർ ഏപ്രിലിൽ ഇന്റേൺസായി ചുമതലയെടുക്കും. ഇവർക്കെല്ലാം വ്യക്തിഗത ടാർഗെറ്റുകൾ നിശ്ചയിച്ചിട്ടുണ്ട്. ജില്ലാ, താലൂക്ക് വ്യവസായ ഓഫീസുകൾക്കും ടാർഗെറ്റുകളുണ്ട്. ഏപ്രിലിൽ പഞ്ചായത്തുതല ശിൽപ്പശാലകളും മെയ് മാസത്തിൽ വായ്പ/ ലൈസൻസ് മേളകളും സംഘടിപ്പിക്കും.

ഒരു തദ്ദേശഭരണ സ്ഥാപനത്തിൽ ഒരു ഉൽപ്പന്നം എന്ന കാഴ്ചപ്പാടോടെ പട്ടിക തയ്യാറാക്കി. ഓരോ തദ്ദേശഭരണ സ്ഥാപനവും ഇത് ചർച്ച ചെയ്ത് അംഗീകരിക്കണം.  ഇതോടൊപ്പം മറ്റു സംരംഭങ്ങൾ തുടങ്ങുന്നതിനും തടസ്സമുണ്ടാകില്ല. വ്യവസായ മേഖലയിൽ മികച്ച പ്രവർത്തനം നടത്തുന്ന പഞ്ചായത്തുകൾക്ക് അവാർഡ് നൽകാനും നിശ്ചയിച്ചിട്ടുണ്ട്. വ്യവസായങ്ങൾ നടത്തുമ്പോൾ അഭിമുഖീകരിക്കുന്ന പ്രശ്നങ്ങൾ പരിഹരിക്കുന്നതിന് എല്ലാ ജില്ലയിലും എംഎസ്എംഇ ക്ലിനിക്കുകൾ ആരംഭിച്ചു. 168 വിദഗ്ധരുടെ സേവനം സാങ്കേതികവിദ്യ, മാർക്കറ്റിങ്, മാനേജ്മെന്റ്‌, നിയമം തുടങ്ങിയ മേഖലകളിൽ സൗജന്യമായി ലഭ്യമാണ്‌.

ഒരു വർഷം കൊണ്ട് ഒരു ലക്ഷം സംരംഭങ്ങൾ ആരംഭിക്കുന്നതിലൂടെ 4 ലക്ഷത്തോളം തൊഴിലവസരങ്ങൾ സൃഷ്ടിക്കപ്പെടും. കോടിക്കണക്കിന് രൂപയുടെ നിക്ഷേപം വ്യവസായമേഖലയിലുണ്ടാകും. വൈജ്ഞാനിക സമ്പദ്ഘടനയിലേക്കുള്ള പാതയിൽ മുതൽക്കൂട്ടാകുമെന്ന് പ്രതീക്ഷിക്കുന്ന 'സംരംഭക വർഷം' കേരളത്തിൻ്റെ വ്യവസായ മേഖലയിൽ സൃഷ്ടിക്കുന്ന ഉണർവ്വും ചലനവും, മുന്നോട്ടുള്ള യാത്രയിലും വലിയ ഉത്തേജനമായി മാറും. തൊഴിലന്വേഷകരും ചെറുപ്പക്കാരും വീട്ടമ്മമാരും വിദ്യാർത്ഥികളും എന്നു വേണ്ട, നാനാ മേഖലകളിൽ നിന്നുള്ളവർ സംരംഭകരായി മാറുന്നതിന് ഈ സംരംഭക വർഷം സാക്ഷിയാകും.

അവസാനമായി അപ്ഡേറ്റ് ചെയ്തത് : 2022-08-27 17:13:04