സംസ്ഥാനത്ത് ഭിന്നശേഷി സൗഹൃദാന്തരീക്ഷം കൂടുതൽ ശക്തിപ്പെടുത്തുന്നതിന്റെയും ഭിന്നശേഷിക്കാരായ വ്യക്തികൾക്കും ബന്ധപ്പെട്ടവർക്കും ഉപജീവനമാർഗം ഒരുക്കുന്നതിന്റെയും ഭാഗമായി, ഭിന്നശേഷി ക്ഷേമ കോർപ്പറേഷൻ ഖാദി ഔട്ട്‌ലെറ്റുകളുടെ ശൃംഖല ആരംഭിക്കുന്നു. എബിലിറ്റി ബിയോണ്ട് ലിമിറ്റ്‌സ് (Ability Beyond Limits) പദ്ധതിയുടെ ഭാഗമായി ഏബിൾ പോയിന്റ് (Able Point) എന്ന പേരിലാണ് എല്ലാ ജില്ലകളിലും യൂണിറ്റുകൾ സ്ഥാപിക്കുന്നത്. ഭിന്നശേഷി ക്ഷേമ കോർപ്പറേഷനും ഭാരതീയ ഖാദി ഗ്രാമ വ്യവസായ സഹകരണ സംഘവും ചേർന്നാണ് ഈ പദ്ധതി നടപ്പാക്കുന്നത്. ഭിന്നശേഷിക്കാരായ വ്യക്തികളുടെ സാമൂഹിക ഇടപെടലിനും സാമ്പത്തിക ശാക്തീകരണത്തിനും പിന്തുണ നൽകുകയെന്നതാണ് പദ്ധതിയുടെ ലക്ഷ്യം.

ഖാദി ഉൽപ്പന്നങ്ങളുടെ വിപണന കേന്ദ്രങ്ങളായി എബിലിറ്റി ബിയോണ്ട് ലിമിറ്റ്‌സ് പദ്ധതിയ്ക്ക് കീഴിൽ ഓരോ ഏബിൾ പോയിന്റും പ്രവർത്തിക്കും. ഖാദി ബോർഡിന്റെ പിന്തുണയുള്ള മൈക്രോ യൂണിറ്റുകൾക്ക് പ്രോത്സാഹനം നൽകുന്നതിനൊപ്പം, അവയുടെ ഉൽപ്പന്നങ്ങൾ വിപണിയിലെത്തിക്കുന്നതിനുള്ള കേന്ദ്രങ്ങളായും ഈ ഔട്ട്‌ലെറ്റുകൾ മാറും. ഭിന്നശേഷിക്കാർക്ക് പുറമെ, മാനസിക വെല്ലുവിളി നേരിടുന്നവർ, മാനസിക രോഗം ഭേദമായവർ, ബൗദ്ധിക വെല്ലുവിളി നേരിടുന്ന വ്യക്തികളുടെ രക്ഷാകർത്താക്കൾ എന്നിവർക്കും എബിലിറ്റി ബിയോണ്ട് ലിമിറ്റ്‌സ് പദ്ധതിയിലൂടെ തൊഴിൽ ലഭ്യമാകും. കൂടാതെ, ഖാദി ബോർഡുമായി ബന്ധപ്പെട്ട കരകൗശല തൊഴിലാളികൾ, നെയ്ത്തുകാർ, സ്ത്രീകൾ നയിക്കുന്ന കുടിൽ വ്യവസായങ്ങൾ തുടങ്ങിയവയ്ക്കും സുസ്ഥിര വിപണി ശൃംഖല സൃഷ്ടിക്കാനാകും.ഉപഭോക്താക്കൾക്ക് ഉയർന്ന നിലവാരമുള്ള ഖാദി ഉൽപ്പന്നങ്ങളുടെ ദൃശ്യതയും അവ സ്വന്തമാക്കാനുള്ള സാധ്യതയും വർദ്ധിപ്പിച്ചു കൊണ്ടുള്ളതാവും ഏബിൾ പോയന്റ് യൂണിറ്റ്.  

ജനസാന്ദ്രതയുള്ള സ്ഥലങ്ങൾ, ജില്ലാഭരണകൂട കേന്ദ്രങ്ങൾ, തദ്ദേശസ്വയംഭരണ സ്ഥാപനങ്ങൾ, ജില്ല/താലൂക്ക് ആശുപത്രി പരിസരങ്ങൾ എന്നിവിടങ്ങളിലെ ഒഴിഞ്ഞു കിടക്കുന്ന ഭൂമിയും വനിത, ദേവസ്വം, ടൂറിസം വകുപ്പുകളുടെ കീഴിലുള്ള ഒഴിവുള്ള സ്ഥലങ്ങളും ഏബിൾ പോയിന്റ് ഔട്ട്‌ലെറ്റുകൾക്കായി വിനിയോഗിക്കും. വിനോദസഞ്ചാര കേന്ദ്രങ്ങൾ, പ്രമുഖ ആരാധനാലയ പരിസരങ്ങൾ എന്നിവിടങ്ങളിലും യൂണിറ്റുകൾ ആരംഭിക്കും.

Stand Alone Modular Units അഥവാ പെട്ടെന്ന് സജ്ജീകരിക്കാനാകുന്നതും എളുപ്പത്തിൽ മാറ്റി സ്ഥാപിക്കാവുന്നതുമായ രീതിയിലാണ് ഏബിൾ പോയിന്റുകൾ നിർമിക്കുക. ലഭ്യമായ സ്ഥലത്തിനും സൗകര്യങ്ങൾക്കും അനുസൃതമായാവും ഓരോ യൂണിറ്റും രൂപകൽപ്പന ചെയ്യുക. 20x10 അടി മുതൽ 40x10 അടി വരെ ഉള്ള വലുപ്പത്തിൽ ഈ സംവിധാനങ്ങൾ സ്ഥാപിക്കും. പ്ലഗ്-ആൻഡ്-പ്ലേ മോഡലുകളായതിനാൽ, വൈദ്യുതിയും ജല സ്രോതസ്സുകളും ഒരേ സമയം തന്നെ ബന്ധിപ്പിക്കാവുന്നതാണ്.

ഗുണഭോക്താക്കൾക്ക് പ്രതിമാസം പതിനയ്യായിരത്തിൽ കുറയാത്ത വേതനം ഉറപ്പാക്കുന്ന തരത്തിലാണ് ഏബിൾ പോയിന്റ് പദ്ധതിയൊരുക്കിയിരിക്കുന്നത്. ഭിന്നശേഷി ക്ഷേമ കോർപ്പറേഷൻ അപേക്ഷ ക്ഷണിച്ച് അർഹരായവരെ തിരഞ്ഞെടുക്കും. ഇവർക്ക് കസ്റ്റമർ സർവീസ്, വിൽപ്പന തന്ത്രങ്ങൾ, ഉൽപ്പന്ന പരിജ്ഞാനം, ഇൻവെന്ററി മാനേജ്‌മെന്റ് എന്നിവയിൽ മികച്ച പരിശീലനം നൽകുന്നതിനായി ബന്ധപ്പെട്ട സർക്കാർ ഏജൻസികളെയും എൻജിഒകളെയും സഹകരിപ്പിക്കും. വിവിധ സ്വകാര്യ സ്ഥാപനങ്ങളിൽ നിന്നും എൻജിഒകളിൽ നിന്നും വ്യക്തികളിൽ നിന്നും ലഭിക്കുന്ന സ്പോൺസർഷിപ്പുകൾ ഏബിൾ പോയിന്റ് യൂണിറ്റുകൾ സ്ഥാപിക്കുന്നതിനായി ഉപയോഗിക്കും.

ഭിന്നശേഷിക്കാർക്ക് ആത്മവിശ്വാസവും സാമ്പത്തിക സ്വാതന്ത്ര്യവും നൽകുന്ന ഈ പദ്ധതി, അവരുടെ ജീവിത നിലവാരം ഉയർത്തുന്നതിനൊപ്പം സമൂഹത്തിന്റെ സമഗ്രമായ പുരോഗതിയിലും നിർണായകമായ പങ്ക് വഹിക്കും. തൊഴിൽസാധ്യത ഉറപ്പാക്കുന്ന ഏബിൾ പോയിന്റുകൾ, ഖാദി ഉൽപ്പന്ന വിപണിയിലും ഗുണപ്രദമാകും.

ഭിന്നശേഷി ക്ഷേമ കോർപ്പറേഷൻ

അവസാനമായി അപ്ഡേറ്റ് ചെയ്തത് : 2025-04-02 16:19:57