സാമൂഹ്യവികസനത്തിൽ മാതൃകാപരമായ മുന്നേറ്റങ്ങൾ നടത്തുന്നതിന്റെ ഭാഗമായി വയോജനങ്ങളുടെ പരിരക്ഷയും ക്ഷേമവും ഉറപ്പാക്കാൻ വയോജന കമ്മീഷൻ രൂപീകരിച്ച് കേരളം. രാജ്യത്താദ്യമായാണ് ഒരു സംസ്ഥാനം വയോജനങ്ങൾക്കായി കമ്മീഷൻ രൂപീകരിക്കുന്നത്.  സംസ്ഥാന നിയമസഭ പാസാക്കിയ കേരള വയോജന കമ്മീഷൻ ബിൽ കേരളത്തിൽ വയോജന സംരക്ഷണ രംഗത്ത് പുതുയുഗം സൃഷ്ടിക്കും.സാമൂഹ്യ നീതി വകുപ്പിന്  കീഴിലാണ് വയോജന കമ്മീഷൻ പ്രവർത്തിക്കുന്നത്.  

വയോജനങ്ങളുടെ (60 വയസ്സിന് മുകളിലുള്ളവർ)  ക്ഷേമം, സംരക്ഷണം, പുനരധിവാസം തുടങ്ങി ജീവിതത്തിന്റെ എല്ലാ മേഖലകളിലും സുരക്ഷിതത്വം ഉറപ്പാക്കി അവരുടെ ഉത്പാദനക്ഷമത, മൗലികവും നൂതനവുമായ ആശയങ്ങൾ, മറ്റ് സർഗ്ഗാത്മക കഴിവുകൾ എന്നിവ സാമൂഹിക സാമ്പത്തിക വികസനത്തിന് ഉപയോഗിക്കുക എന്നതാണ് കമ്മീഷന്റെ പ്രഥമ ലക്ഷ്യം. അവഗണനയും ചൂഷണവും അനാഥത്വവും അടക്കമുള്ള വയോജനതയുടെ ജീവിത പ്രയാസങ്ങൾ സംബന്ധിച്ച് വർധിച്ചുവരുന്ന ഉത്കണ്ഠകൾ അടിയന്തിരമായി കമ്മീഷൻ അഭിസംബോധന ചെയ്യും. 

വയോജനങ്ങളുടെ പുനരധിവാസം സാധ്യമാക്കാനും അവരുടെ കഴിവുകൾ പൊതുസമൂഹത്തിന് ഉപയുക്തമാക്കുന്നതിനാവശ്യമായ പ്രവർത്തനങ്ങൾ ഏറ്റെടുത്തു നടത്തുന്നതിനും അവകാശ സംരക്ഷണം ഉറപ്പുവരുത്തുന്നതിനുമായാണ് വയോജന കമ്മീഷൻ നിലവിൽ വരിക. അർദ്ധ ജുഡീഷ്യൽ അധികാരങ്ങളോടെയാണ് കമ്മീഷൻ രൂപീകരിക്കപ്പെടുന്നത്. വയോജനങ്ങളുടെ ക്ഷേമവും സംരക്ഷണവുമായി ബന്ധപ്പെട്ട് മാർഗ്ഗനിർദ്ദേശങ്ങൾ നൽകാൻ കമ്മീഷന് ചുമതലയുണ്ടാവും. 

വയോജനങ്ങളുടെ ക്ഷേമത്തിനും സംരക്ഷണത്തിനുമായി കമ്മീഷൻ മാർഗ്ഗനിർദ്ദേശങ്ങൾ നൽകുകയും സഹായിക്കുകയും ചെയ്യും. അവർക്ക് പുനരധിവാസം ആവശ്യമുള്ളിടത്ത് സർക്കാരുമായി സഹകരിച്ച് അത് സാധ്യമാക്കുന്നതും ഏതെങ്കിലും തരത്തിലുളള നിയമസഹായം ആവശ്യമുളളിടത്ത് ആയത് കമ്മീഷൻ ലഭ്യമാക്കും. കമ്മീഷന്റെ തീരുമാനങ്ങൾ അതിന്റെ ശിപാർശ സഹിതം ഉചിതമായ നടപടിക്കായോ അല്ലെങ്കിൽ തർക്കത്തിലേർപ്പെട്ട കക്ഷികൾക്ക് പരിഹാരത്തിനായോ സർക്കാരിലേക്ക് അയക്കാം. 

കമ്മീഷനിൽ സർക്കാർ വിജ്ഞാപനം വഴി നിയമിക്കുന്ന ഒരു ചെയർപേഴ്സണും നാലിൽ കവിയാത്ത എണ്ണം അംഗങ്ങളും ഉണ്ടായിരിക്കും. ചെയർപേഴ്സൺ ഉൾപ്പെടെ കമ്മീഷനിൽ നിയമിക്കപ്പെടുന്ന എല്ലാ അംഗങ്ങളും വയോജനങ്ങൾ ആയിരിക്കും. അവരിൽ ഒരാൾ പട്ടികജാതികളിലോ പട്ടികഗോത്ര വർഗ്ഗങ്ങളിലോ പെട്ടയാളും മറ്റൊരാൾ വനിതയും ആയിരിക്കും.വയോജന കമ്മീഷൻ തിരുവനന്തപുരം ആസ്ഥാനമായി പ്രവർത്തിക്കും.

കേരളത്തിന്റെ സാമൂഹ്യ-സാമ്പത്തിക വികസനത്തെ ഗണ്യമായി സ്വാധീനിക്കുന്ന കമ്മീഷനായി വയോജന കമ്മീഷൻ മാറും.വയോജന ക്ഷേമത്തിലും സംരക്ഷണത്തിലും രാജ്യത്ത് ഉയർന്നുനിൽക്കുന്ന കേരളത്തെ ഇനിയും കൂടുതൽ വയോജനസൗഹൃദപരമാക്കാനുള്ള സുപ്രധാന തീരുമാനമാണ് കമ്മീഷന്റെ രൂപീകരണം. കേരളം രാജ്യത്താദ്യമായി നടപ്പിലാക്കുന്ന വയോജന കമ്മീഷൻ, സാമൂഹിക നീതിയും മനുഷ്യാവകാശ സംരക്ഷണവും ഉറപ്പാക്കുന്നതിന്റെ നേർ മാതൃകയാണ്. പ്രായമായവരുടെ ക്ഷേമവും സംരക്ഷണവും ശക്തിപ്പെടുത്തുന്നതിനായി രൂപീകരിച്ച ഈ കമ്മീഷൻ, വയോജനങ്ങൾക്ക് അഭിമാനപൂർണവും സുരക്ഷിതവുമായ ജീവിതം ഉറപ്പാക്കുന്നതിനുള്ള നിർണ്ണായക ചുവടുവയ്പ്പായി മാറും.

അവസാനമായി അപ്ഡേറ്റ് ചെയ്തത് : 2025-03-21 15:11:46