ഈ വർഷത്തെ എസ്.എസ്.എൽ.സി പരീക്ഷാഫലം സംസ്ഥാന സർക്കാരിന്റെ ഏകീകൃത സേവന പ്ലാറ്റ്‌ഫോമായ 'നമ്മുടെ കേരളം' മൊബൈൽ ആപ്പിലൂടെയും ലഭ്യമാകും. വിദ്യാർത്ഥികൾക്കും രക്ഷിതാക്കൾക്കും കൂടുതൽ വേഗത്തിലും എളുപ്പത്തിലും ഫലം പരിശോധിക്കാനുള്ള വിപുലമായ സൗകര്യമാണ് ആപ്പിൽ ഒരുക്കിയിരിക്കുന്നത്.

ഔദ്യോഗിക ഫലപ്രഖ്യാപനം നടന്നാലുടൻ ആപ്പിലെ പ്രത്യേക ലിങ്ക് വഴി വിവരങ്ങൾ തത്സമയം ലഭ്യമാകും. ഫലപ്രഖ്യാപന സമയത്ത് വെബ്‌സൈറ്റുകളിൽ ഉണ്ടാകാനിടയുള്ള അമിതമായ തിരക്കും സാങ്കേതിക തടസ്സങ്ങളും ഒഴിവാക്കി, വളരെ ലളിതമായി ഫലം അറിയാൻ ഈ സംവിധാനം സഹായിക്കും. വിവിധ സർക്കാർ സേവനങ്ങൾ ഒരൊറ്റ പ്ലാറ്റ്‌ഫോമിൽ ലഭ്യമാക്കുന്നതിന്റെ ഭാഗമായാണ് പരീക്ഷാ ഫലങ്ങളും 'നമ്മുടെ കേരളം' ആപ്പിൽ ഉൾപ്പെടുത്തിയിരിക്കുന്നത്.

ഗൂഗിൾ പ്ലേ സ്റ്റോറിൽ (https://play.google.com/store/apps/details?id=com.itmission.nk) നിന്നോ ആപ്പിൾ ആപ്പ് സ്റ്റോറിൽ (https://apps.apple.com/in/app/nammude-keralam/id1595554541) നിന്നോ 'Nammude Keralam' ആപ്പ് ഡൗൺലോഡ് ചെയ്യുക. ആപ്പിൽ വൺ ടൈം രജിസ്‌ട്രേഷൻ പൂർത്തിയാക്കി ലോഗിൻ ചെയ്യുക. ഹോം പേജിലെ 'SSLC Results' എന്ന ഓപ്ഷൻ തിരഞ്ഞെടുക്കുക. നിങ്ങളുടെ രജിസ്റ്റർ നമ്പറും ജനന തീയതിയും നൽകി സബ്മിറ്റ് ചെയ്യുക.

അവസാനമായി അപ്ഡേറ്റ് ചെയ്തത് :14-05-2026