ഐഐടി/ഐഐഎം/ഐഐഎസ്‌സി/ഐഎംഎസ്‌സി അഡ്മിഷൻ നേടിയ വിദ്യാർത്ഥികൾക്ക് സംസ്ഥാന ന്യൂനപക്ഷക്ഷേമ വകുപ്പ് നൽകുന്ന സ്‌കോളർഷിപ്പിന് അപേക്ഷിക്കാം. പി.ജി./പിഎച്ച്ഡി കോഴ്സുകളിൽ പഠനം നടത്തുന്ന ന്യൂനപക്ഷ വിഭാഗത്തിലെ (മുസ്ലീം, ക്രിസ്ത്യൻ (എല്ലാവിധ വിഭാഗങ്ങൾക്കുമുള്ള), സിഖ്, ബുദ്ധ, ജൈന, പാഴ്സി) വിദ്യാർത്ഥികൾക്കാണ് സ്‌കോളർഷിപ്പ് ലഭിക്കുക.

അപേക്ഷകർ ബന്ധപ്പെട്ട യോഗ്യതാ പരീക്ഷയിൽ (ഡിഗ്രി/ബി.ഇ/ബി.ടെക്) 55% മാർക്ക് നേടിയിരിക്കണം. ഐഐടി/ഐഐഎം/ഐഐഎസ്‌സിയിൽ രണ്ട് വർഷത്തെ ബിരുദാനന്തര ബിരുദം പഠിക്കുന്ന ഒന്നാം അല്ലെങ്കിൽ രണ്ടാം വർഷ വിദ്യാർത്ഥികൾക്ക് സ്‌കോളർഷിപ്പിന് അപേക്ഷിക്കാം. 

ഒന്നാം/രണ്ടാം/മൂന്നാം/നാലാം/അഞ്ചാം വർഷ ഐഎംഎസ്‌സി വിദ്യാർത്ഥികൾക്കും സ്‌കോളർഷിപ്പിന് അപേക്ഷിക്കാൻ അർഹതയുണ്ട്. ബിപിഎൽ വിഭാഗത്തിലെ അപേക്ഷകരെ പരിഗണിച്ചതിന് ശേഷം മാത്രമേ എപിഎൽ വിഭാഗത്തിലെ, വാർഷിക വരുമാനം 8 ലക്ഷം രൂപ വരെ ഉള്ള വിദ്യാർത്ഥികളെ പരിഗണിക്കുകയുള്ളൂ.

കേരളത്തിലെ സ്ഥിരതാമസക്കാരായ അല്ലെങ്കിൽ കേരളത്തിൽ ജനിച്ച വിദ്യാർത്ഥികൾക്കാണ് സ്‌കോളർഷിപ്പ് അനുവദിക്കുന്നത്. 50% സ്‌കോളർഷിപ്പ് പെൺകുട്ടികൾക്കായി സംവരണം ചെയ്തിട്ടുണ്ട്. നിശ്ചിത ശതമാനം പെൺകുട്ടികൾ ഇല്ലാത്ത പക്ഷം അർഹരായ ആൺകുട്ടികളെയും സ്‌കോളർഷിപ്പിന് പരിഗണിക്കും. ഒരേ കുടുംബത്തിൽ വാർഷിക വരുമാനം സമാനമായ വിദ്യാർത്ഥികളിൽ നിന്ന് ഉയർന്ന മാർക്ക് നേടിയ വിദ്യാർത്ഥിയ്ക്ക് മുൻഗണന ലഭിക്കും.

തെരഞ്ഞെടുക്കുന്ന വിദ്യാർത്ഥിയ്ക്ക് കോഴ്സ് കാലാവധിക്കുളളിൽ 50,000 രൂപയാണ് സ്‌കോളർഷിപ്പ് തുകയായി അനുവദിക്കുന്നത്. ഒറ്റ തവണ ലഭിക്കുന്ന സ്‌കോളർഷിപ്പ് പദ്ധതിയാണിത്. മുൻ വർഷം വകുപ്പിൽ നിന്നും പ്രസ്തുത സ്‌കോളർഷിപ്പ് ലഭിച്ച വിദ്യാർത്ഥികൾക്ക് വീണ്ടും അപേക്ഷിക്കാൻ കഴിയില്ല. കൂടാതെ മറ്റു വകുപ്പുകളിൽ / സ്ഥാപനങ്ങളിൽ നിന്നും ഐഐടി/ഐഐഎം/ഐഐഎസ്‌സി/ഐഎംഎസ്‌സി എന്നീ സ്ഥാപനങ്ങളിൽ പഠിക്കുന്ന വിദ്യാർത്ഥികൾക്ക് അനുവദിക്കുന്ന മറ്റ് സ്‌കോളർഷിപ്പുകൾ ലഭിച്ച വിദ്യാർത്ഥികൾ പ്രസ്തുത സ്‌കോളർഷിപ്പിന് അപേക്ഷിക്കേണ്ടതില്ല. അപേക്ഷകർക്ക് ഏതെങ്കിലും ഷെഡ്യൂൾഡ് കൊമേഴ്സ്യൽ ബാങ്കിൽ സ്വന്തം പേരിൽ അക്കൗണ്ട് ഉണ്ടായിരിക്കണം.

വിവരങ്ങൾ www.minoritywelfare.kerala.gov.in-ൽ ലഭ്യമാണ്. അവസാന തീയതി: ഒക്ടോബർ 31 വൈകിട്ട് 5. ഡയറക്ടർ, ന്യൂനപക്ഷക്ഷേമ വകുപ്പ്, നാലാം നില, വികാസ് ഭവൻ, തിരുവനന്തപുരം - 33 എന്ന വിലാസത്തിലേക്ക് അപേക്ഷ തപാൽ മുഖേനയോ, വകുപ്പിൽ നേരിട്ടോ സമർപ്പിക്കണം. ഫോൺ:0471-2300524, 0471-2302090, 0471-2300523.

അവസാനമായി അപ്ഡേറ്റ് ചെയ്തത് :23-10-2025