ഐക്യരാഷ്ട്രസഭയുടെ സുസ്ഥിര വികസന ലക്ഷ്യങ്ങൾ (Sustainable Development Goals - SDG) നടപ്പിലാക്കുന്നതിൽ ഇന്ത്യയിലെ മറ്റ് സംസ്ഥാനങ്ങളെ ബഹുദൂരം പിന്നിലാക്കി കേരളം. നീതി ആയോഗ് പുറത്തുവിട്ട ഏറ്റവും പുതിയ 'SDG ഇന്ത്യ ഇൻഡക്സ്' പ്രകാരം, സാമൂഹികവും സാമ്പത്തികവും പരിസ്ഥിതിപരവുമായ ലക്ഷ്യങ്ങൾ സന്തുലിതമായി കൈവരിച്ചതിലൂടെയാണ് കേരളം അഭിമാനകരമായ പുരോഗതി കൈവരിച്ചത്.
ദാരിദ്ര്യ നിർമ്മാർജ്ജനം, ആരോഗ്യം, വിദ്യാഭ്യാസം, ലിംഗസമത്വം, ശുദ്ധജലം, പരിസ്ഥിതി സംരക്ഷണം എന്നിങ്ങനെ 17 ആഗോള ലക്ഷ്യങ്ങളെ ആസ്പദമാക്കിയാണ് ഓരോ സംസ്ഥാനത്തിന്റെയും പ്രകടനം അളക്കുന്നത്. ഈ വിവിധ മേഖലകളിലെ പ്രകടനത്തെ ക്രോഡീകരിച്ച് നൽകുന്ന മാർക്കിനെ 'കോമ്പോസിറ്റ് സ്കോർ' എന്ന് വിളിക്കുന്നു.
ഇന്ത്യയിലെ സംസ്ഥാനങ്ങളുടെ ശരാശരി സ്കോറിനേക്കാൾ വളരെ മുന്നിലാണ് കേരളത്തിന്റെ സ്ഥാനം. വികസിത രാജ്യങ്ങളോട് കിടപിടിക്കുന്ന സൂചികകളാണ് പല മേഖലകളിലും കേരളം കാഴ്ചവെക്കുന്നത്. 2018, 2019,2020,2023 എന്നീ വര്ഷങ്ങളിലെ SDG പ്രകടനം വിലയിരുത്തുമ്പോള് കേരളത്തിന്റെ സ്കോര് ഓരോ വര്ഷവും വ്യക്തമായ മുന്നേറ്റമാണ് സൂചിപ്പിക്കുന്നത്. ദേശീയ തലത്തില് 71 സ്കോര് നേടുന്നതില് കേരളത്തിന്റെ (79) സ്കോര് വലിയ പങ്കുവഹിക്കുന്നു.
കേരളത്തിന്റെ വിജയം ഏതെങ്കിലും ഒരു മേഖലയിൽ മാത്രമായി ഒതുങ്ങുന്നതല്ല. സാമൂഹിക സുരക്ഷ (Social), സാമ്പത്തിക വളർച്ച (Economic), പരിസ്ഥിതി സംരക്ഷണം (Environmental) എന്നീ മൂന്ന് മേഖലകളിലും കേരളം മികച്ച പ്രകടനം കാഴ്ചവെക്കുന്നു. ശിശുമരണ നിരക്ക് കുറയ്ക്കുന്നതിലും, മാതൃമരണ നിരക്ക് നിയന്ത്രിക്കുന്നതിലും, ഉയർന്ന സാക്ഷരത നിലനിർത്തുന്നതിലും കേരളം കൈവരിച്ച നേട്ടം SDG സ്കോർ ഉയരാൻ പ്രധാന കാരണമായി.
സാമൂഹിക വിഭാഗത്തിൽ ആരോഗ്യം, വിദ്യാഭ്യാസം, വിശപ്പ് രഹിത കേരളം വിഭാഗങ്ങളിൽ സംസ്ഥാനം മികച്ച പ്രകടനം കാഴ്ചവെച്ചു. സാമ്പത്തികവും വ്യവസായവും (Economic) സ്ഥിരതയുള്ള തൊഴിൽ അവസരങ്ങൾ, ദാരിദ്ര്യ നിർമാർജനം തുടങ്ങിയ മേഖലകളിലെ പ്രവർത്തനങ്ങളുടെ മികവിൽ കേരളം മുന്നിലെത്തി.
ശുദ്ധജലം, സാനിറ്റേഷൻ, പുനരുപയോഗ ഊർജ്ജം എന്നിവയിലെ തിളക്കമാർന്ന പ്രകടനത്തോടെ പരിസ്ഥിതി (Environmental) വിഭാഗത്തിൽ കേരളം മികവ് പുലർത്തി. നവകേരള നിർമ്മിതിയുടെ ഭാഗമായി സർക്കാർ നടപ്പിലാക്കുന്ന ആർദ്രം, ലൈഫ്, വിദ്യാഭ്യാസ സംരക്ഷണ യജ്ഞം തുടങ്ങിയ മിഷനുകൾ SDG ലക്ഷ്യങ്ങളുമായി നേരിട്ട് ബന്ധപ്പെട്ടിരിക്കുന്നു. താഴെത്തട്ടിലുള്ള വികസന പ്രവർത്തനങ്ങൾ മുതൽ അത്യാധുനിക അടിസ്ഥാന സൗകര്യ വികസനം വരെ നീളുന്ന സർക്കാരിന്റെ കേരള മോഡൽ 'വികസന ദർശനം' ലോകത്തിന് തന്നെ ഒരു മാതൃകയാണ്.
ആഗോള തലത്തിൽ ഐക്യരാഷ്ട്രസഭ നിശ്ചയിച്ചിട്ടുള്ള ലക്ഷ്യങ്ങൾ 2030-ഓടെ പൂർണ്ണമായും കൈവരിക്കാനുള്ള പാതയിലാണ് കേരളം. ഡേറ്റകൾ സൂചിപ്പിക്കുന്നത് പോലെ, സാമ്പത്തിക വളർച്ചയും സാമൂഹിക സുരക്ഷയും ഒരുപോലെ കൊണ്ടുപോകുന്ന കേരളത്തിന്റെ രീതി സുസ്ഥിര വികസനത്തിന് ആഗ്രഹിക്കുന്ന ഏതൊരു പ്രദേശത്തിനും പിന്തുടരാവുന്നതാണ്.
സുസ്ഥിര വികസന ലക്ഷ്യങ്ങൾ (SDG) 2023: സ്കോറിൽ കേരളം ഒന്നാമത് :
