കേരളത്തിന്റെ വിദ്യാഭ്യാസ മേഖല കൈവരിച്ചുകൊണ്ടിരിക്കുന്ന നേട്ടങ്ങള് ആഗോള തലത്തില് തന്നെ ശ്രദ്ധിക്കപ്പെടുന്നതാണ്. ഏറ്റവും പുതിയ 2024-25 വര്ഷത്തെ സ്ഥിതിവിവരക്കണക്കുകള് പ്രകാരം, സെക്കന്ഡറി, ഹയര് സെക്കന്ഡറി സ്കൂള് പ്രവേശന നിരക്കില് (GER) കേരളം (93%) ഇന്ത്യയില് തന്നെ ഏറ്റവും മുന്നില് നില്ക്കുന്ന സംസ്ഥാനങ്ങളിലൊന്നായി തുടരുന്നു. വിദ്യാഭ്യാസം ഓരോ കുട്ടിയുടെയും അവകാശമാണെന്ന സര്ക്കാരിന്റെ ദൃഢനിശ്ചയവും, പൊതുവിദ്യാഭ്യാസ സംരക്ഷണ യജ്ഞത്തിന്റെ വിജയവുമാണ് ഈ കണക്കുകള് പ്രതിഫലിപ്പിക്കുന്നത്.
ഒരു നിശ്ചിത ക്ലാസ് തലത്തില് പഠിക്കേണ്ട പ്രായത്തിലുള്ള കുട്ടികളില് എത്ര ശതമാനം പേര് വിദ്യാലയങ്ങളില് പ്രവേശനം നേടിയിട്ടുണ്ട് എന്നതിന്റെ സൂചികയാണ് GER. ഈ നിരക്ക് ഉയര്ന്നു നില്ക്കുന്നത് വിദ്യാലയങ്ങളില് നിന്നുള്ള കൊഴിഞ്ഞുപോക്ക് ഏറ്റവും കുറവാണെന്നും കുട്ടികള് കൃത്യമായി ഉന്നത പഠനത്തിലേക്ക് എത്തുന്നുണ്ടെന്നും സൂചിപ്പിക്കുന്നു.
2024-25 കാലഘട്ടത്തിലെ ഡേറ്റ വിശകലനം ചെയ്യുമ്പോള് സെക്കന്ഡറി വിദ്യാഭ്യാസ രംഗത്ത് ദേശീയ ശരാശരിയേക്കാള് ഏറെ മുകളിലാണ് കേരളത്തിന്റെ പ്രവേശന നിരക്ക്. സെക്കന്ഡറി തലത്തില് രാജ്യത്ത് തന്നെ ഏറ്റവും ഉയര്ന്ന GER രേഖപ്പെടുത്തുന്ന ചുരുക്കം സംസ്ഥാനങ്ങളില് ഒന്നാണ് കേരളം. ദേശീയ ശരാശരി സെക്കന്ഡറി വിദ്യാഭ്യാസമേഖലയില് 66.5 ശതമാനമായി റിപ്പോര്ട്ട് ചെയ്യുമ്പോള് കേരളത്തിന്റേത് 93 ശതമാനമാണ്. ആണ്കുട്ടികളുടെയും (91.9%)പെണ്കുട്ടികളുടെയും (94.2%) പ്രവേശന നിരക്കില് വലിയ വ്യത്യാസമില്ലാത്തത് സംസ്ഥാനത്തിന്റെ വിദ്യാഭ്യാസ രംഗത്തിന്റെ മികവായി കണക്കാക്കാം.
സംസ്ഥാനത്തെ എല്ലാ പൊതുവിദ്യാലയങ്ങളും അന്താരാഷ്ട്ര നിലവാരത്തിലുള്ള സ്മാര്ട്ട് ക്ലാസ് മുറികളായി മാറിയത് കുട്ടികളെ വിദ്യാലയങ്ങളിലേക്ക് ആകര്ഷിക്കുന്നു. യൂണിഫോം, പാഠപുസ്തകം, ഉച്ചഭക്ഷണം തുടങ്ങിയവ കൃത്യമായി ഉറപ്പാക്കുന്നത് വഴി സാമ്പത്തികമായി പിന്നോക്കം നില്ക്കുന്ന കുട്ടികള്ക്കും പഠനം തുടരാന് സാധിക്കുന്നു. വിദ്യാഭ്യാസം കുട്ടികളുടെ ഭാവിക്ക് അത്യന്താപേക്ഷിതമാണെന്ന ബോധം കേരളത്തിലെ താഴെത്തട്ടിലുള്ള കുടുംബങ്ങളില് പോലുമുണ്ട്. സെക്കന്ഡറി വിദ്യാഭ്യാസ രംഗത്തെ ഈ ഉയര്ന്ന പ്രവേശന നിരക്ക് കേരളത്തിന്റെ ഭാവി വിജ്ഞാന സമൂഹമായി കേരളത്തെ മാറ്റുക എന്ന ലക്ഷ്യത്തിന് കരുത്തേകും.
