കേരളത്തിന്റെ ആരോഗ്യ നിലവാരം ലോക ശ്രദ്ധയാകർഷിച്ചതാണ്. ഇന്ത്യയിലെ സംസ്ഥാനങ്ങളുടെ ആയുർദെെർഘ്യത്തിന്റെ പുതിയ കണക്കുകളിൽ കേരളം ഏറെ മുന്നിലാണ്. സ്ത്രീ-പുരുഷ ആയുർദെെർഘ്യത്തിൽ കേരളം രാജ്യത്ത് ഒന്നാമതാണ്. 2019–23 കാലയളവിൽ കേരളത്തിലെ ശരാശരി ആയുസ്സ് 75 വർഷമാണ്. പുരുഷന്മാർക്ക് ഏകദേശം 72 വർഷവും സ്ത്രീകൾക്ക് 78 വർഷത്തിലധികവുമാണ് ആയുസ്സ് കണക്കാക്കുന്നത്. ഇത് ദേശീയ ശരാശരിയേക്കാൾ വളരെ മുന്നിലാണ്. കേരളത്തിലെ ആരോഗ്യ സംവിധാനങ്ങളുടെ കാര്യക്ഷമതയും ലഭ്യതയും വ്യാപ്തിയും സാമൂഹികാവബോധവുമാണ് ഈ നേട്ടം കെെവരിക്കാൻ കേരളത്തെ സഹായിച്ചത്.
ആയുർദെെർഘ്യത്തിലെ ഈ മുന്നേറ്റം സ്ഥിരതയോടെ തുടരുന്നതാണ് ഏറ്റവും ശ്രദ്ധേയമായ വസ്തുത. 2016–20 മുതൽ 2019–23 വരെയുള്ള കാലങ്ങളിലും കേരളത്തിന്റെ ആയുർദെെർഘ്യം ശരാശരി 75 ആയി തുടർന്നു. മറ്റൊരു ഇന്ത്യൻ സംസ്ഥാനത്തിനും കേരളത്തിന്റെ ഈ നേട്ടം മറികടക്കാനായിട്ടില്ല. ഓരോ ഘട്ടത്തിലും ഒന്നാം സ്ഥാനം നിലനിർത്താൻ കേരളത്തിന് കഴിഞ്ഞിട്ടുണ്ട്. മറ്റ് പല സംസ്ഥാനങ്ങളിലും ശരാശരി ആയുസ്സ് 60-കളുടെ മധ്യത്തിലും 70-കളുടെ ആരംഭത്തിലുമാണ്. കേരളത്തിന്റെ പൊതുജനാരോഗ്യ സംവിധാനത്തിന്റെ ശക്തി തെളിയിക്കുന്നതാണ് ഈ കണക്കുകൾ.
പൊതുജനാരോഗ്യ മേഖലയിലെ ദീർഘകാല നിക്ഷേപങ്ങളും സാർവ്വജന്യ വിദ്യാഭ്യാസവും വ്യാപകമായ വാക്സിനേഷനും കാര്യക്ഷമമായ പ്രാഥമിക ആരോഗ്യ സേവനങ്ങളും കേരളത്തിന്റെ വിജയത്തിന് അടിസ്ഥാനമാണ്. മാതൃ-ശിശു ആരോഗ്യത്തിന് നൽകിയ പ്രാധാന്യം, രോഗങ്ങളെ തുടക്കത്തിൽ തന്നെ കണ്ടെത്തുന്ന സംവിധാനങ്ങൾ, ഗ്രാമപ്രദേശങ്ങളിലേക്കും ദരിദ്ര വിഭാഗങ്ങളിലേക്കും ആരോഗ്യ സേവനം എത്തിക്കുന്ന സർക്കാർ ആശുപത്രികൾ എന്നിവ കേരളത്തിന്റെ ആയുർദെെർഘ്യം ഉയർത്തുന്നതിൽ നിർണായക പങ്ക് വഹിച്ചു.
