കേരളത്തിൻ്റെ ഡിജിറ്റൽ ഭാവിയെ നിർവചിക്കുന്ന ചരിത്രപരമായ സംവാദ വേദിയായി ഇലക്ട്രോണിക്സ് & ഇൻഫർമേഷൻ ടെക്നോളജി വിഭാഗം സംഘടിപ്പിച്ച ReCode Kerala – വിഷൻ 2031 സംസ്ഥാനതല സെമിനാർ മാറി. 2025 ഒക്ടോബർ 28-ന് കാക്കനാട് കിൻഫ്ര ഇൻ്റർനാഷണൽ കൺവെൻഷൻ സെൻ്ററിൽ സംഘടിപ്പിച്ച സെമിനാറിൽ, സംസ്ഥാന സർക്കാരിൻ്റെ ഐ.ടി. മേഖലയിലെ 'വിഷൻ 2031' കരട് റിപ്പോർട്ട് പുറത്തിറക്കി.
കേരളത്തിൻ്റെ ഡിജിറ്റൽ ട്രാൻസ്ഫർമേഷൻ്റെ അടുത്ത ഘട്ടം രൂപപ്പെടുത്തുന്ന ഈ സെമിനാർ മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. മന്ത്രിമാർ, മുതിർന്ന ഉദ്യോഗസ്ഥർ, ഐ.ടി. മേഖലയിലെ പ്രമുഖ വ്യവസായ പ്രതിനിധികൾ, ഗവേഷകർ തുടങ്ങിയവർ പരിപാടിയിൽ പങ്കെടുത്തു.
വിവരസാങ്കേതികവിദ്യ, ഇലക്ട്രോണിക്സ്, സെമികണ്ടക്ടർ, നൂതന സാങ്കേതികവിദ്യാ മേഖലകളെ ഉൾക്കൊള്ളുന്ന വിഷൻ 2031 കരട് റിപ്പോർട്ട്, കേരളത്തിന് വൻ സാമ്പത്തിക വളർച്ചയാണ് ലക്ഷ്യമിടുന്നത്. 2031 ഓടെ 50 ബില്യൺ യുഎസ് ഡോളറിൻ്റെ സാമ്പത്തിക വളർച്ച, അഞ്ച് ലക്ഷം ഹൈവാല്യൂ (High-Value) തൊഴിലവസരങ്ങൾ സൃഷ്ടിക്കൽ, 20,000 കോടി രൂപയുടെ സ്റ്റാർട്ടപ്പ് നിക്ഷേപം ആകർഷിക്കുക, 20,000 സ്റ്റാർട്ടപ്പുകൾ യാഥാർഥ്യമാക്കുക, 30 ദശലക്ഷം ചതുരശ്ര അടി പുതിയ ഐ.ടി. ഓഫീസ് സൗകര്യങ്ങൾ തുടങ്ങിയ ലക്ഷ്യങ്ങളാണ് വിഷൻ കരട് രേഖ മുന്നോട്ടുവെച്ചത്.
പരമ്പരാഗത ഐ.ടി. സേവനങ്ങളിൽ നിന്ന് മാറി ഗ്ലോബൽ കാപബിലിറ്റി സെൻ്ററുകളിലും (GCCs) ആധുനിക ഗവേഷണ-വികസന മേഖലകളിലും നിക്ഷേപം ആകർഷിക്കാനാണ് സർക്കാർ ലക്ഷ്യമിടുന്നത്. 2031-ൽ സംസ്ഥാനത്ത് 120 ജി.സി.സികൾ യാഥാർഥ്യമാക്കും.ഈ ലക്ഷ്യങ്ങൾ നേടുന്നതിനായി, സംസ്ഥാന സർക്കാർ നാല് സ്ട്രാറ്റജിക് മിഷനുകൾക്ക് രൂപം നൽകി.
കേരള ആർട്ടിഫിഷ്യൽ ഇൻ്റലിജൻസ് മിഷൻ (കെ-എഐഎം): നൈതികവും സുതാര്യവുമായ നിർമിതബുദ്ധിയുടെ ഉപയോഗം ഉറപ്പാക്കുന്നതിനായി 2030-ഓടെ 'കേരള നിർമിത ബുദ്ധി അവകാശ ബിൽ' നടപ്പിലാക്കും.
കേരള സെമികോൺ മിഷൻ: സെമികണ്ടക്ടർ മേഖലയിലെ വളർച്ച ലക്ഷ്യമിടുന്നു.
കേരള ഫ്യൂച്ചർ ടെക് മിഷൻ (കെ.എഫ്.ടി.എം.): സൈബർ സുരക്ഷയും ഗ്രീൻ കംപ്യൂട്ടിങ് പാർക്കുകളും ഉൾപ്പെടുന്ന ഭാവി ടെക് മേഖലയ്ക്ക് രൂപം നൽകാൻ ലക്ഷ്യമിടുന്നു.
ദി ഫ്യൂചർ കോർപറേഷൻ (ടി.എഫ്.സി.): 'Kerala: Global Talent. Ethical Tech. Sustainable Growth' എന്ന ബ്രാൻഡിനു കീഴിൽ ആഗോള നിക്ഷേപം ആകർഷിക്കുന്ന ഏജൻസിയായി പ്രവർത്തിക്കും.
സെമിനാറിൽ, ഡിജിറ്റൽ അടിസ്ഥാന സൗകര്യ വികസനം, യുവജനങ്ങൾക്ക് ഭാവി-തയ്യാറായ ഡിജിറ്റൽ കഴിവുകൾ വികസിപ്പിക്കൽ, എ.ഐ. അടിസ്ഥാനമാക്കിയ സ്മാർട്ട് ഗവർണൻസ്, പുതിയ നയപരമായ ദിശകൾ തുടങ്ങിയ വിഷയങ്ങൾ ചർച്ച ചെയ്തു. ഡിജിറ്റൽ ഗവേണൻസിൽ കേരള മോഡൽ സൃഷ്ടിച്ച് 100 ശതമാനം ഓൺലൈൻ സർക്കാർ സേവനങ്ങൾ 2031-ഓടെ ഉറപ്പാക്കുക. ഫ്രീ ആൻഡ് ഓപ്പൺ സോഴ്സ് സോഫ്റ്റ്വെയർ (FOSS) ഉപയോഗം ശക്തിപ്പെടുത്തി സർക്കാർ സോഫ്റ്റ്വെയർ ചെലവ് 30 ശതമാനം കുറയ്ക്കും. ഐ.സി.ടി. അകാദമി വഴി 10 ലക്ഷം പേരെ എ.ഐ. അടക്കമുള്ള മേഖലകളിൽ പരിശീലനം നൽകും.
ടെക്നോസിറ്റി, ഇൻഫോപാർക് ഫേസ് 3, സൈബർ പാർക്കിൻ്റെ വിപുലീകരണം, കെ-സ്പേസ് എയ്റോസ്പേസ് ക്ലസ്റ്റർ തുടങ്ങിയ പദ്ധതികൾ വിഷൻ ഡോക്യുമെൻ്റിലുണ്ട്. സ്ത്രീ സംരംഭകത്വം പ്രോത്സാഹിപ്പിക്കാനും ഗ്രാമീണ മേഖലകളിലേക്ക് ഐ.ടി. വ്യാപിക്കാനുമായി 50 ലീപ് സെൻ്ററുകൾ, 250 ഏർലി ഇന്നോവേഷൻ സെൻ്ററുകൾ, 14 ജില്ലകളിലും ഫ്രീഡം സ്ക്വയറുകൾ തുടങ്ങിയ നിർദേശങ്ങളും ഇതിലുണ്ട്. 2029 ഓടെ ആനിമേഷൻ, ഗെയിമിങ്, വിഷ്വൽ ഇഫക്റ്റ്സ് മേഖലയിൽ 250 കമ്പനികൾ സ്ഥാപിച്ച് 10 ശതമാനം ദേശീയ കയറ്റുമതി പങ്കാളിത്തം നേടാൻ ലക്ഷ്യമിടുന്നു.
ഉയർന്ന മാനവ വിഭവശേഷി, കുറഞ്ഞ ജോലി ഉപേക്ഷിക്കൽ നിരക്ക്, കെ-ഫോൺ വഴി ലഭ്യമായ ഹൈസ്പീഡ് ഇൻ്റർനെറ്റ്, കുറഞ്ഞ ചെലവിൽ ലഭ്യമായ ഓഫീസ് സൗകര്യങ്ങൾ എന്നിവ ലക്ഷ്യങ്ങൾ കൈവരിക്കുന്നതിൽ കേരളത്തിന് അനുകൂലമായ ഘടകങ്ങളായി ഐ.ടി. വകുപ്പ് സ്പെഷ്യൽ സെക്രട്ടറി സീറാം സാംബശിവ റാവു ഐ.എ.എസ്. ചൂണ്ടിക്കാട്ടി. ReCode Kerala – Vision 2031, ഒരു സെമിനാർ എന്നതിലുപരി, സംസ്ഥാനത്തിൻ്റെ ഡിജിറ്റൽ വളർച്ച സംയോജിതമായി നിർവ്വചിക്കുന്ന ഒരു “നയ-രൂപീകരണ ബ്ലൂപ്രിൻ്റ്” ആയി മാറി.
