വിജ്ഞാന സമ്പദ് വ്യവസ്ഥയിലേക്കുള്ള കേരളത്തിന്റെ പ്രയാണത്തില് വലിയ മുന്നേറ്റമുണ്ടാക്കാന് അവസരമൊരുക്കുന്ന ജനറേറ്റീവ് എഐ ഇന്റര്നാഷണല് കോണ്ക്ലേവ് ജൂലൈ 11, 12 തീയതികളില് കൊച്ചിയിൽ നടക്കും. ആര്ട്ടിഫിഷ്യല് ഇന്റലിജന്സിന്റെ പരിവര്ത്തന സാധ്യതകളും സമൂഹത്തിലും സമ്പദ് വ്യവസ്ഥയിലും അതിന്റെ സ്വാധീനവും സമ്മേളനം ചര്ച്ചചെയ്യും. നൂതന സാങ്കേതികവിദ്യകള് സ്വീകരിക്കുന്നതിനും നവീകരണത്തെ പ്രോത്സാഹിപ്പിക്കുന്നതിനുമുള്ള കേരളത്തിന്റെ പ്രതിബദ്ധത സമ്മേളനം പ്രകടമാക്കും. കേരളത്തെ എ.ഐ ഡെസ്റ്റിനേഷനായി മാറ്റാനും ഇന്ഡസ്ട്രി 4.0 നുള്ള സംസ്ഥാനത്തിന്റെ കാഴ്ചപ്പാട് മുന്നോട്ടുവയ്ക്കാനും സാമ്പത്തിക വളര്ച്ചയെ ഉത്തേജിപ്പിക്കാനും ലക്ഷ്യമിടുന്ന സമ്മേളനത്തില് വ്യവസായ പ്രമുഖര്, നയരൂപകര്ത്താക്കള്, സാങ്കേതിക വിദഗ്ധര്, ഇന്നൊവേറ്റര്മാര് തുടങ്ങിയവര് പങ്കെടുക്കും.
ഡെവലപ്പര്മാര്, സര്വ്വകലാശാലകള്, വിദ്യാര്ത്ഥികള്, മാധ്യമങ്ങള്, അനലിസ്റ്റുകള് തുടങ്ങിയവര് സമ്മേളനത്തിന്റെ ഭാഗമാകും. ഡെമോകള്, ആക്ടിവേഷനുകള്, വ്യവസായ വിദഗ്ധരുമായുള്ള കൂടിക്കാഴ്ച എന്നിവയും കോണ്ക്ലേവില് ഉണ്ടാകും. പ്രഭാഷണങ്ങള്, പാനല് ചര്ച്ചകള്, സംവേദനാത്മക സെഷനുകള് എന്നിവയാണ് സമ്മേളനത്തിലെ പ്രധാന അജണ്ട. പങ്കെടുക്കുന്നവര്ക്ക് എഐ സാങ്കേതികവിദ്യയിലെ ഏറ്റവും പുതിയ മുന്നേറ്റങ്ങള് നേരിട്ട് മനസ്സിലാക്കാന് സാധിക്കുന്ന സംവിധാനങ്ങളും ഒരുക്കും.
അവസാനമായി അപ്ഡേറ്റ് ചെയ്തത് :06-07-2024
