കേരളത്തിലെ മത്സ്യത്തൊഴിലാളി കുടുംബങ്ങളുടെ സാമൂഹിക, സാമ്പത്തിക ഉന്നമനം ലക്ഷ്യമിട്ട് സംസ്ഥാന സർക്കാർ നടപ്പാക്കുന്ന ശ്രദ്ധേയമായ പദ്ധതികളിലൊന്നാണ് തീരമൈത്രി സീഫുഡ് റെസ്റ്റോറന്റുകൾ. മത്സ്യത്തൊഴിലാളി വനിതകൾക്ക് തൊഴിലും വരുമാനവും ഉറപ്പുവരുത്തി, സാധാരണ ജനങ്ങൾക്ക് കുറഞ്ഞവിലയിൽ മികച്ച സീഫുഡ് ലഭ്യമാക്കുകയാണ് ലക്ഷ്യം. മത്സ്യത്തൊഴിലാളികളെയും അവരുടെ കുടുംബങ്ങളെയും സംരംഭകത്വത്തിലേക്ക് കൈപിടിച്ച് ഉയർത്താനും, ഉത്പന്നങ്ങൾക്ക് ന്യായവില ഉറപ്പാക്കാനും, ജീവിതനിലവാരം മെച്ചപ്പെടുത്താനും ലക്ഷ്യമിടുന്ന പദ്ധതിയാണിത്.
പദ്ധതിയുടെ ലക്ഷ്യങ്ങൾ:
തീരദേശവാസികളായ വനിതകൾക്കും ഗ്രൂപ്പുകൾക്കും സ്വന്തമായി സീഫുഡ് റെസ്റ്റോറന്റുകൾ ആരംഭിക്കാനുള്ള പരിശീലനവും സാമ്പത്തിക സഹായവും നൽകുന്നു. ഇത് പരമ്പരാഗത മത്സ്യബന്ധന മേഖലയിൽ മാത്രം ഒതുങ്ങിനിൽക്കാതെ പുതിയ വരുമാനമാർഗങ്ങൾ കണ്ടെത്താൻ അവരെ സഹായിക്കുന്നു. 5 ലക്ഷം രൂപ വരെ 5 പേരടങ്ങുന്ന ഒരു സീഫുഡ് റെസ്റ്റോറന്റ് രൂപീകരിക്കുന്നതിനായി ഗ്രാന്റ് നൽകുന്നു. പദ്ധതി തുകയുടെ 75 ശതമാനം ഗ്രാന്റും, 20 ശതമാനം ബാങ്ക് ലോണും 5 ശതമാനം ഗുണഭോക്തൃ വിഹിതവുമായാണ് പദ്ധതി നടപ്പാക്കുന്നത്.
തീരമൈത്രി റെസ്റ്റോറന്റുകളിലൂടെ ഗുണമേന്മയുള്ളതും ശുദ്ധവുമായ കടൽ വിഭവങ്ങൾ നേരിട്ട് ഉപഭോക്താക്കളിലേക്ക് എത്തിക്കാൻ സാധിക്കുന്നു.
നേരിട്ട് മത്സ്യം സംഭരിക്കുന്നതിനാൽ ഇടനിലക്കാരെ ഒഴിവാക്കാനും മത്സ്യത്തൊഴിലാളികൾക്ക് മികച്ച വില ലഭിക്കാനും സഹായമാണ്. ഓരോ റെസ്റ്റോറന്റും നിരവധി പേർക്ക് നേരിട്ടും, അല്ലാതെയും തൊഴിലവസരങ്ങൾ സൃഷ്ടിക്കുന്നു. റെസ്റ്റോറന്റ് നടത്തിപ്പ്, പാചകം, സർവീസ്, ശുചീകരണം, മത്സ്യ സംഭരണം, വിതരണം എന്നിങ്ങനെ വിവിധ മേഖലകളിൽ തൊഴിൽ ലഭ്യത ഉണ്ടാക്കുന്നു. തീരദേശ ടൂറിസത്തെ പ്രോത്സാഹിപ്പിക്കാനും തീരദേശ ഭക്ഷണവൈവിധ്യം സഞ്ചാരികൾക്ക് പരിചയപ്പെടുത്താനും റെസ്റ്റോറന്റുകൾ സഹായിക്കുന്നു. പല റെസ്റ്റോറന്റുകളും ടൂറിസം കേന്ദ്രങ്ങളോട് ചേർന്നോ തീരദേശങ്ങളിലോ ആണ് സ്ഥാപിച്ചിരിക്കുന്നത്.
പദ്ധതിയുടെ ഭാഗമാകുന്ന കുടുംബങ്ങൾക്ക് സ്ഥിര വരുമാനം ഉറപ്പാക്കുന്നതിലൂടെ സാമ്പത്തികമായി ശാക്തീകരിക്കാൻ സാധിക്കുന്നു. തീരദേശത്തെ വനിതാ സംരംഭകർക്ക് മുൻഗണന നൽകുന്നതിലൂടെ സ്ത്രീ ശാക്തീകരണവും സാധ്യമാക്കുന്നു.
ഫിഷറീസ് വകുപ്പിന്റെ സാമ്പത്തിക സഹായത്തിനൊപ്പം കേരള സംസ്ഥാന തീരദേശ വികസന കോർപ്പറേഷൻ, മത്സ്യഫെഡ് എന്നിവയുടെ പങ്കാളിത്തം റെസ്റ്റോറന്റ് സ്ഥാപിക്കുന്നതിനും വിജയകരമായി മുന്നോട്ട് കൊണ്ടുപോകുന്നതിനും സഹായകമാണ്. ഇതിനകം 9 തീരദേശ ജില്ലകളിലായി 35 തീരമൈത്രി സീഫുഡ് റസ്സ്റ്റോറന്റുകൾ വിജയകരമായി പ്രവർത്തിക്കുന്നുണ്ട്. പ്രാദേശികമായി ജനപ്രീതി നേടുന്നതിനൊപ്പം വിനോദസഞ്ചാരികളെയും ആകർഷിക്കുന്നു. പദ്ധതിയുടെ തുടർച്ചയായ വികാസം തീരദേശമേഖലയിലെ ജീവിതനിലവാരം ഉയർത്താൻ കാര്യമായ സംഭാവന നൽകുന്നുണ്ട്.
