സഹകരണ വകുപ്പിന്റെ 'സഹകാരി സാന്ത്വനം' പദ്ധതി, സഹകരണ മേഖലയിൽ പ്രവർത്തിച്ചവർക്ക് വലിയ ആശ്വാസമാണ് നൽകുന്നത്. ദീർഘകാലം സഹകരണ രംഗത്തിന്റെ വളർച്ചയ്ക്കായി പ്രവർത്തിച്ചവരോ നിലവിൽ പ്രവർത്തിച്ചുകൊണ്ടിരിക്കുന്നവരോ ആയ, സാമ്പത്തികമായി പിന്നാക്കം നിൽക്കുന്ന സഹകാരികളെ സഹായിക്കുക എന്നതാണ് ഈ പദ്ധതിയുടെ പ്രധാന ലക്ഷ്യം.
ആർക്കൊക്കെ സഹായം ലഭിക്കും?
സർക്കിൾ (താലൂക്ക്)/ജില്ല/സംസ്ഥാന തലങ്ങളിൽ സഹകരണ മേഖലയുടെ പുരോഗതിക്കായി പ്രവർത്തിക്കുകയും, നിലവിൽ അവശത അനുഭവിക്കുകയും ചെയ്യുന്ന, വാർഷിക വരുമാനം 3,00,000 രൂപയിൽ താഴെയുള്ള സഹകാരികൾക്കാണ് 'സഹകാരി സാന്ത്വനം' ആനുകൂല്യം ലഭിക്കുന്നത്.
സാമ്പത്തിക സഹായങ്ങൾ:
* രോഗ ശുശ്രൂഷയ്ക്കും ചികിത്സയ്ക്കും: പരമാവധി 50,000 രൂപ ധനസഹായം ലഭിക്കും.
* കുടുംബത്തിനുള്ള ധനസഹായം (മരണപ്പെട്ടാൽ): സഹകാരി മരണപ്പെട്ടാൽ അവരുടെ കുടുംബത്തിന്/ആശ്രിതർക്ക് പരമാവധി 25,000 രൂപ ധനസഹായം ലഭിക്കും.
ഈ സർക്കാർ അധികാരത്തിൽ വന്നശേഷം, 'സഹകാരി സാന്ത്വനം' പദ്ധതിയിലൂടെ ഇതുവരെ 547 അപേക്ഷകളിലായി 1,32,74,500 രൂപ അനുവദിച്ചു.
സഹകരണ മേഖലയിലെ ജീവിതാവസ്ഥകളെ പരിഗണിച്ച്, അവരെ ചേർത്തുപിടിക്കുന്ന ഈ സർക്കാർ നടപടിക്ക് വലിയ സ്വീകാര്യതയാണ് ലഭിക്കുന്നത്.
