ഡിജിറ്റൽ കേരളം എന്ന സ്വപ്നം യാഥാർത്ഥ്യമാക്കി, കേരളത്തിന്റെ സ്വന്തം ഇന്റർനെറ്റ് കണക്ഷനായ കെ-ഫോൺ പദ്ധതി ഇതിനകം പിന്നിട്ടത് ഒരു ലക്ഷം അതിവേഗ ഇന്റർനെറ്റ് കണക്ഷനുകൾ എന്ന നാഴികക്കല്ല്!. ഡിജിറ്റൽ ഡിവൈഡിന് ബദലായി, എല്ലാവർക്കും ഇന്റർനെറ്റ് എന്ന ലക്ഷ്യത്തോടെ സംസ്ഥാന സർക്കാർ നടപ്പാക്കുന്ന ഈ ബൃഹദ് പദ്ധതി, കേരളത്തിന്റെ ഭരണമികവിന്റെ മറ്റൊരു ഉജ്ജ്വല മാതൃകയാണ്. വാഹന ഗതാഗതംപോലും പ്രയാസമുള്ള ആദിവാസി മേഖലകൾ, ദ്വീപ് പ്രദേശങ്ങളിലുമുൾപ്പടെ സംസ്ഥാനത്തുടനീളം കണക്ഷനുകൾ നൽകിയാണ് ഒരു ലക്ഷം ഉപഭോക്താക്കളെന്ന നേട്ടത്തിലേക്ക് കെ-ഫോൺ എത്തിയത്.
ആദിവാസി ഉന്നതികൾ, ദ്വീപ് പ്രദേശങ്ങൾ, ബി.പി.എൽ. ഭവനങ്ങൾ എന്നിവിടങ്ങളിൽ ഉൾപ്പെടെ സമൂഹത്തിലെ എല്ലാവിഭാഗം ജനങ്ങൾക്കും അതിവേഗ ഇന്റർനെറ്റ് ലഭ്യമാക്കുക എന്നതാണ് കെ-ഫോൺ ലക്ഷ്യമിടുന്നത്. ഗ്രാമ-നഗര വ്യത്യാസമില്ലാതെ എല്ലാ വീടുകളിലും ഇന്റർനെറ്റ് സൗകര്യം സാധ്യമാക്കുന്നതിലൂടെ ഡിജിറ്റൽ സാക്ഷരതയും സേവനലഭ്യതയും വർദ്ധിപ്പിക്കാൻ ഇത് സഹായിക്കുന്നു. സർക്കാർ ഓഫീസുകളെയും വ്യവസായങ്ങളെയും സേവനദാതാക്കളെയും ബന്ധിപ്പിക്കുന്നതിലൂടെ സംസ്ഥാനത്തിന്റെ സാമ്പത്തിക-വിദ്യാഭ്യാസ മേഖലകളിലും കെ-ഫോൺ വലിയ ഉണർവ് നൽകുന്നു.
62781 എഫ്ടിടിഎച്ച് കണക്ഷനുകൾ, സർക്കാർ സ്ഥാപനങ്ങളിൽ 23,163 കണക്ഷനുകൾ, സർക്കാർ-സ്വകാര്യ സ്ഥാപനങ്ങൾക്കായി 2729 കണക്ഷനുകൾ, ഒന്നാം ഘട്ടത്തിൽ 5251ഉം രണ്ടാംഘട്ടത്തിൽ 6150ഉം ഉൾപ്പടെ 11402 ബി.പി.എൽ കണക്ഷനുകൾ, ഒൻപത് ഡാർക്ക് ഫൈബർ ഉപഭോക്താക്കൾ (ഏഴായിരത്തിലധികം കിലോമീറ്റർ), പ്രത്യേക പരിപാടികൾക്കായി 14 കണക്ഷനുകൾ എന്നിങ്ങനെ ആകെ 100098 ഉപഭോക്താക്കളാണ് നിലവിൽ കെഫോൺ കണക്ഷനുകൾ ഉപയോഗിക്കുന്നത്. ആകെ 3800 ലോക്കൽ നെറ്റുവർക്ക് പ്രൊവൈഡർമാർ കണക്ഷനുകൾ നൽകാനായി കെഫോണുമായി സഹകരിച്ച് പ്രവർത്തിക്കുന്നുണ്ട്.
കെ-ഫോൺ നേട്ടങ്ങൾ ഇതുവരെ:
1,00,000+ അതിവേഗ ഇന്റർനെറ്റ് കണക്ഷനുകൾ ഇതിനോടകം നൽകിക്കഴിഞ്ഞു.
31,000+ KM ഒപ്ടിക്കൽ ഫൈബർ നെറ്റ്വർക്ക് സംസ്ഥാനത്തുടനീളം വ്യാപിച്ച് കിടക്കുന്നു.
3,800+ ലോക്കൽ നെറ്റ്വർക്ക് പ്രൊവൈഡേഴ്സുമായി സഹകരിച്ച് പ്രവർത്തിക്കുന്നു, ഇത് സേവനങ്ങൾ ജനങ്ങളിലേക്ക് വേഗത്തിൽ എത്തിക്കാൻ സഹായിക്കുന്നു.
30,000 ഓളം സർക്കാർ ഓഫീസുകളെ ഹൈസ്പീഡ് ഇന്റർനെറ്റ് വഴി ബന്ധിപ്പിച്ചു കഴിഞ്ഞു.
375+ POSP (Point of Sale Person) - അതായത് പ്രാദേശിക തലത്തിൽ സേവനം നൽകുന്ന വിതരണക്കാരുടെ എണ്ണം വർദ്ധിച്ചു.
5.6 T OTN (Optical Transport Network) സ്വിച്ചിംഗ് കപ്പാസിറ്റി - അതിവേഗ ഡാറ്റാ കൈമാറ്റത്തിന് ആവശ്യമായ അത്യാധുനിക സാങ്കേതിക സൗകര്യങ്ങൾ കെ-ഫോണിനുണ്ട്.
വിനോദ മേഖലയെ ലക്ഷ്യമിട്ടുള്ള OTT (Over-The-Top) സേവനങ്ങൾ കെ-ഫോൺ വഴി ഉടൻ ലഭ്യമാക്കാൻ ഒരുങ്ങുന്നു.
FTTH (Fiber to The Home), FTTO (Fiber to The Office), ILL (Internet Leased Line), L2VPN, L3VPN, MANAGED WI-FI SERVICES, DARK FIBER FOR LEASE തുടങ്ങിയ ആധുനിക സേവനങ്ങൾ കെ-ഫോൺ നൽകുന്നുണ്ട്. ഇത് വ്യക്തിഗത ഉപയോക്താക്കൾക്കും സ്ഥാപനങ്ങൾക്കും ഒരുപോലെ പ്രയോജനകരമാണ്. കേരളത്തിന്റെ ഡിജിറ്റൽ ഭാവിക്ക് അടിത്തറയിടുന്ന കെ-ഫോൺ പദ്ധതി, സുതാര്യമായ ഭരണത്തിലേക്കും കൂടുതൽ ജനസൗഹൃദപരമായ സേവനങ്ങളിലേക്കും സംസ്ഥാനത്തെ നയിക്കുന്നു. സാങ്കേതികവിദ്യയുടെ സാധ്യതകൾ സാധാരണക്കാർക്ക് പോലും പ്രാപ്യമാക്കുന്നതിലൂടെ, കെ-ഫോൺ കേരളത്തിന്റെ സമഗ്രവികസനത്തിൽ നിർണായക പങ്കാണ് വഹിക്കുന്നത്. കൂടുതൽ വിവരങ്ങൾക്കും കണക്ഷൻ ലഭിക്കാനും: ഹെൽപ്പ് ലൈൻ: 1800 570 4466; വെബ്സൈറ്റ്: www.kfon.in
