മികച്ച  ക്ഷയരോഗ നിവാരണ പ്രവർത്തനങ്ങൾക്ക് ദേശീയതലത്തിൽ അംഗീകാരവുമായി കേരളം. ആരോഗ്യ വകുപ്പ് ഏകോപിപ്പിച്ച 100 ദിനകർമ്മ പരിപാടിയിലൂടെ സംസ്ഥാനത്ത് ഏറ്റവും കൂടുതൽ നാറ്റ് (NAAT - Nucleic Acid Amplification Test)  പരിശോധനകൾ നടത്തുകയും ക്ഷയരോഗ ബാധിതരെ പ്രാരംഭ ഘട്ടങ്ങളിൽ കണ്ടെത്തി ചികിത്സ നൽകുകയും ചെയ്തതിനാണ് ആരോഗ്യ-കുടുംബക്ഷേമ മന്ത്രാലയത്തിന്റെ ദേശീയ അംഗീകാരം ലഭിച്ചത്. 

2024 ഡിസംബർ 7 മുതൽ 2025 മാർച്ച് 7 വരെ നടന്ന ക്ഷയരോഗ നിവാരണ പദ്ധതിയിൽ ആകെ 87,330 പേർക്കാണ് പരിശോധന നടത്തിയത്. അതിൽ 71,238 പേർക്കും ആധുനിക മോളിക്യൂലർ പരിശോധനായ സി.ബി.നാറ്റ്, ട്രൂനാറ്റ് പരിശോധനകൾ നടത്തി. 18 ശതമാനം പേർക്ക്  പഴയരീതിയിലുള്ള മൈക്രോസ്‌കോപ്പ് പരിശോധനയാണ് നടത്തിയത്. സംസ്ഥാനത്തെ നാറ്റ് പരിശോധന ശരാശരി 82 ശതമാനമാണ്.  5,588 ക്ഷയരോഗ ബാധിതരെ കണ്ടെത്തി തുടർചികിത്സ നൽകി. 

ക്ഷയരോഗ നിവാരണത്തിനായി വിവിധങ്ങളായ പദ്ധതികളാണ് സംസ്ഥാനത്ത് നടപ്പിലാക്കി വരുന്നത്. സർക്കാർ മേഖലയോടൊപ്പം സ്വകാര്യ മേഖലയിലെയും ക്ഷയരോഗ നിവാരണ പ്രവർത്തനങ്ങൾ ഏകോപിപ്പിച്ചതിന് 2022ലും 2023ലും സംസ്ഥാനത്തിന് ദേശീയ പുരസ്‌കാരങ്ങൾ ലഭിച്ചിട്ടുണ്ട്. 2024ൽ 138 തദ്ദേശ സ്വയംഭരണ സ്ഥാപനങ്ങൾ ക്ഷയരോഗ മുക്ത പഞ്ചായത്ത് അവാർഡിന് അർഹത നേടി. വയനാട്, ഇടുക്കി ജില്ലകളിലെ പകുതിയിലധികം തദ്ദേശ സ്വയംഭരണ സ്ഥാപനങ്ങളും ക്ഷയരോഗമുക്ത പദവിക്ക് അർഹത നേടിയിട്ടുണ്ട്.

100 ദിന കർമ്മ പരിപാടിയുടെ ഭാഗമായി വിപുലമായ ക്യാമ്പയിനാണ് ആരോഗ്യ വകുപ്പ് സംഘടിപ്പിച്ചത്. ഇതിലൂടെ പ്രിസന്റീവ് ടിബി എക്‌സാമിനേഷൻ നിരക്ക് വർഷത്തിൽ ഒരു ലക്ഷം ജനസംഖ്യയിൽ 1500ൽ നിന്ന് 2201 ആയി ഉയർത്താനായി. ഈ ക്യാമ്പയിനിലൂടെ സംസ്ഥാനത്ത് ക്ഷയരോഗ സാധ്യത കൂടിയ 81.6 ലക്ഷം വ്യക്തികളെ മാപ്പ് ചെയ്തു. രോഗലക്ഷണങ്ങൾ പ്രകടിപ്പിച്ച 1,98,101 പേർക്ക് വിശദ പരിശോധന നടത്തി. അതിൽ 5,588 ക്ഷയരോഗ ബാധിതരെ കണ്ടെത്തി തുടർചികിത്സ ഉറപ്പാക്കാനായി.

ക്ഷയരോഗ നിവാരണ രംഗത്ത് കേരളം നേടിയ ഈ ദേശീയ അംഗീകാരം സംസ്ഥാനത്തിന്റെ ആരോഗ്യമേഖലയിൽ നടപ്പാക്കിയ ഫലപ്രദമായ ഇടപെടലുകൾക്കുള്ള അംഗീകാരമാണ്.  വിദ്യാഭ്യാസം, ആരോഗ്യ പരിരക്ഷ, സാമൂഹിക നീതി എന്നിവ സാധ്യമാക്കുന്നതിന്റെ ഭാഗമായി സർക്കാർ വകുപ്പുകളും തദ്ദേശ സ്വയംഭരണ സ്ഥാപനങ്ങളും ക്ഷയരോഗ നിവാരണത്തിനായി ചേർന്ന് നടത്തിയ കൂട്ടായ പരിശ്രമം കേരളത്തെ മുന്നിലെത്തിച്ച പ്രധാന ഘടകമാണ്. മുൻ വർഷങ്ങളിലേതുപോലെ ഈ വർഷവും കേരളം ദേശീയ തലത്തിൽ മികച്ച പ്രകടനം കാഴ്ചവയ്ക്കുന്നതിലൂടെ, 2025ഓടെ രാജ്യത്ത് ക്ഷയരോഗം വിമുക്തമെന്ന ലക്ഷ്യത്തിലേക്ക് ഒരു വലിയ മുന്നേറ്റം നടത്തുന്നുവെന്നത് സംസ്ഥാനത്തിനാകെ അഭിമാനകരമാണ്.

അവസാനമായി അപ്ഡേറ്റ് ചെയ്തത് : 2025-04-04 10:52:16