ഭൂരഹിതരില്ലാത്ത സംസ്ഥാനമെന്ന നേട്ടത്തിലേക്കുള്ള കേരളത്തിന്റെ മുന്നേറ്റം സമാനതകളില്ലാത്തതാണ്. 'എല്ലാവർക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാർട്ട്' എന്ന പ്രഖ്യാപനവുമായി റവന്യൂ വകുപ്പ് ഈ ദൗത്യത്തിനൊപ്പമുണ്ട്. 2021-25 വരെയുള്ള കഴിഞ്ഞ 5 വർഷത്തിനുള്ളിൽ 223,945 പട്ടയങ്ങൾ ആണ് വിതരണം ചെയ്തത്. 2016-21 കാലഘട്ടത്തിൽ 177,011 പട്ടയങ്ങളും വിതരണം ചെയ്തിട്ടുണ്ട്.
വനഭൂമി - ആദിവാസി പട്ടയങ്ങൾക്ക് പ്രാമുഖ്യം നൽകുന്ന പട്ടയ മിഷൻ, പട്ടയ അസംബ്ലി, ഡാഷ്ബോർഡ്, അദാലത്തുകൾ തുടങ്ങിയ പദ്ധതികളിലൂടെ നിലനിൽക്കുന്ന പ്രശ്നങ്ങൾ ലളിതമായി തിരിച്ചറിയുകയും പരിഹരിക്കുകയും ചെയ്യുന്നു. പട്ടയ മിഷൻ സംരംഭത്തിലൂടെ, വില്ലേജ് തലത്തിൽ നിന്നും സെക്രട്ടറിയേറ്റ് വരെയുള്ള സർക്കാർ ഉദ്യോഗസ്ഥർ, പഞ്ചായത്ത് അംഗങ്ങൾ, എം.എൽ.എമാർ എന്നിവരെയെല്ലാം പങ്കെടുപ്പിച്ചാണ് ഈ പ്രവർത്തനങ്ങൾ നടപ്പാക്കുന്നത്.
പട്ടയ അസംബ്ലികൾ നിയോജകമണ്ഡലതലത്തിൽ നിയമസഭാസമാജികരുടെ നേതൃത്വത്തിൽ നടത്തി, ജനപ്രതിനിധികൾ നേരിട്ട് പങ്കെടുത്ത് തദ്ദേശപ്രശ്നങ്ങൾ പരിശോധിക്കുകയും, അവ പട്ടയ മിഷനിലേക്കു കൈമാറി നികുതി ഭൂമി ഉടമസ്ഥാവകാശം ജനങ്ങളിലേക്ക് എത്തിക്കുകയും ചെയ്യുന്നു. വിവിധ വകുപ്പുകളുടെ കീഴിലുള്ള ഭൂമിയിൽ സ്ഥിരതാമസം നടത്തുന്ന അർഹർക്കായി വകുപ്പുകളുടെ അനുമതിയോടെ പട്ടയം അനുവദിക്കുന്ന നടപടികളും സജീവമാണ്.
