കേരളത്തിന്റെ പാരമ്പര്യ വ്യവസായമായ കയർ മേഖല, ഉത്പാദനം വർധിപ്പിച്ചും ആധുനികവത്കരണം സാധ്യമാക്കിയും ഉത്പന്നവൈവിധ്യത്തിലൂടെ ആഗോള വിപണിയിലേക്ക് കടന്നും, പുതിയ ഉയരങ്ങളിലേക്കാണ്.
കയർ വ്യവസായത്തിന്റെ ഉത്പാദനത്തിൽ ഗണ്യമായ വർധനവാണ് കഴിഞ്ഞ വർഷങ്ങളിൽ രേഖപ്പെടുത്തിയിരിക്കുന്നത്. 2015-16ൽ 7,000 ടൺ ആയിരുന്നത് 28,000 ടണ്ണായി ഉയർന്നു. 2025ഓടെ ഇത് 70,000 ടണ്ണായി ഉയർത്താനാണ് സർക്കാർ ലക്ഷ്യമിടുന്നത്. 2024-25 സാമ്പത്തിക വർഷം 11,900 ടൺ കയർ സംഭരിച്ചു. അടുത്ത അഞ്ചുവർഷത്തിനുള്ളിൽ കയർ മേഖലയുടെ പൂർണ യന്ത്രവത്കരണം സാധ്യമാക്കും. ചകിരിമില്ലുകളുടെ എണ്ണം 500 ആയും, ഓട്ടോമാറ്റിക് സ്പിന്നിംഗ് മെഷീനുകളുടെ എണ്ണം 10,000 ആയും, ഓട്ടോമാറ്റിക് ലൂമുകളുടെ എണ്ണം 300 ആയും ഉയർത്താൻ പദ്ധതിയുണ്ട്.
ഇതിന്റെ ഭാഗമായി ഇതിനകം 1,500 ഓട്ടോമേറ്റഡ് സ്പിന്നിംഗ് മെഷീനുകൾ സ്ഥാപിച്ചു. 5 സംഘങ്ങളിൽ ഓട്ടോമാറ്റിക് മെഷീനുകൾ സ്ഥാപിക്കുന്നത് പുരോഗമിക്കുന്നു. കയർഫെഡിന്റെ താവം, മാമ്പറ്റ യൂണിറ്റുകളിൽ ആധുനിക ഡി.എഫ്. മെഷിനറികൾ സ്ഥാപിച്ചു. 4 കയർ സംഘങ്ങളിലും കയർഫെഡിലുമായി 11 ഫുള്ളി ഓട്ടോമാറ്റിക് ലൂമുകൾ സ്ഥാപിക്കാനും കഴിഞ്ഞു. കയർ കോർപ്പറേഷനിൽ ആധുനിക സൗകര്യങ്ങളോടുകൂടിയ പരിശീലനകേന്ദ്രം സ്ഥാപിച്ചിട്ടുണ്ട്. കയർ മേഖലയിലെ പ്രശ്നങ്ങൾ പരിഹരിക്കാനും നൂതന ഉത്പന്നങ്ങൾ വികസിപ്പിക്കാനും സർക്കാർ വിദഗ്ധ സമിതിയുടെ റിപ്പോർട്ടിന്റെ അടിസ്ഥാനത്തിൽ നടപടികൾ സ്വീകരിച്ചുവരികയാണ്.
കയർ ഭൂവസ്ത്രം ഉത്പാദിപ്പിക്കുന്നതിന് നിലവിലുള്ള ലൂമുകളേക്കാൾ ഇരട്ടി ശേഷിയും വിലക്കുറവുമുള്ള മാഗ്നെറ്റിക് ലൂം കെ.എസ്.സി.എം.എം.സി വികസിപ്പിച്ചെടുത്തു. രണ്ട് മാഗ്നെറ്റിക്ക് ലൂമുകൾ സ്ഥാപിക്കാനുള്ള നടപടികൾ നടന്നുവരുന്നു. 500 ഓട്ടോമാറ്റിക് സ്പിന്നിംഗ് മെഷിനുകളും 10 ഡിഫൈബറിംഗ് മെഷീനുകളും നവീകരിച്ച് ഉത്പാദനം വർധിപ്പിക്കാനായി 1.47 കോടി രൂപയാണ് അനുവദിച്ചത്.
ഇന്ത്യയിലെ വിവിധ ഗവേഷണ സ്ഥാപനങ്ങളുമായി ചേർന്ന് പുതിയ ഉത്പന്നങ്ങൾ വികസിപ്പിക്കുന്നുണ്ട്. വിവിധതരം കയർ കോമ്പോസിറ്റുകളും കൃത്രിമ രാസവസ്തുക്കളൊന്നും ഉപയോഗിക്കാത്ത ബോർഡുകളും വലിയ തോതിൽ ഉത്പാദിപ്പിക്കാൻ ലക്ഷ്യമിടുന്നു. ഉണക്കത്തൊണ്ടിൽനിന്നും ഹസ്ക് ചിപ്സ് ഒരുക്കുന്ന യൂണിറ്റുകൾ, പിത്ത് പ്രോസസിംഗ് യൂണിറ്റുകൾ, ബൈൻഡർലെസ് ബോർഡ്, കയർ കോമ്പോസിറ്റ് ബോർഡ് എന്നിവ നിർമ്മിക്കാനുള്ള സാങ്കേതികവിദ്യ വികസിപ്പിച്ചു. നാഷണൽ കയർ റിസർച്ച് ആന്റ് മാനേജ്മെന്റ് ഇൻസ്റ്റിറ്റ്യൂട്ട് (NCRMI) പ്രമുഖ ഗവേഷണ സ്ഥാപനങ്ങളുമായി ചേർന്ന് മൊബൈൽ ടെൻഡർ കോക്കനട്ട് ക്രഷിംഗ് മെഷീൻ, പിയാറ്റ്കോൾ ഡോട്ട്സ്, ക്രഷ്ഡ് ടെൻഡർ കോക്കനട്ട്, പോട്ടിംഗ് ഫില്ലർ ടെക്നോളജി എന്നിവ വികസിപ്പിച്ചു. പുതിയതായി വികസിപ്പിച്ച കയർ കൊണ്ടുള്ള ഗ്രോ ബാഗായ ഇ-കയർ ബാഗ് വാണിജ്യാടിസ്ഥാനത്തിൽ ഉൽപ്പാദിപ്പിക്കാനുള്ള സാങ്കേതികവിദ്യ ഫോമിലിന് കൈമാറി. ഖരമാലിന്യ സംസ്കരണത്തിന് വീടുകളിൽ ഉപയോഗിക്കാൻ കഴിയുന്ന ആക്ടീവ്പീറ്റ് എന്ന സാങ്കേതികവിദ്യയും വികസിപ്പിച്ചു. എൻ.ഐ.ഐ.എസ്.റ്റി.സി.എസ്.ഐ.ആറുമായി ചേർന്ന് ബൈൻഡർലെസ് ബോർഡ്, ഇലക്ട്രിക്കൽ ഇൻസുലേറ്റർ എന്നിവ വികസിപ്പിച്ചു, പേറ്റന്റിംഗ് നടപടികൾ നടന്നുവരുന്നു.
തൊഴിലാളികൾക്ക് മെച്ചപ്പെട്ട വരുമാനം ഉറപ്പുവരുത്താനും ഉത്പന്നങ്ങൾ ആഗോള തലത്തിൽ വിറ്റഴിക്കാനും സർക്കാർ നിരവധി നടപടികൾ സ്വീകരിച്ചു. പരമ്പരാഗത തൊഴിലാളികളുടെ ദിവസക്കൂലിയിലെ സർക്കാർ വിഹിതമായ 110 രൂപ അനുവദിച്ചു നൽകാനായി 58.40 കോടി രൂപ വിതരണം ചെയ്തു. ഓൺലൈൻ വഴിയും അന്താരാഷ്ട്ര കമ്പനികളുമായും കരാറിൽ ഏർപ്പെട്ട് കയർ ഉത്പന്നങ്ങൾ വിറ്റഴിക്കാനുള്ള ശ്രമങ്ങൾ ഊർജ്ജിതമാക്കി. കയർഫെഡിന്റെ 22 ഗോഡൗണുകളിലും കയർ കോർപ്പറേഷന്റെ 5 ഗോഡൗണുകളിലും കെട്ടിക്കിടന്ന ഉത്പന്നങ്ങൾ വിറ്റഴിക്കാൻ സാധിച്ചത് കയർ മേഖലക്ക് വലിയ ഉണർവാണ് നൽകിയത്.
2022-23ൽ 500 ഓട്ടോമേറ്റഡ് സ്പിന്നിംഗ് മെഷീനുകൾ സ്ഥാപിച്ചതിലൂടെ 550 തൊഴിലവസരങ്ങൾ സൃഷ്ടിച്ചു. കയർ സഹകരണസംഘങ്ങളിലെ ശരാശരി വരുമാനം 2015-16ൽ പ്രതിവർഷം 13,380 ആയിരുന്നത് 2021-22ൽ 50,000 കവിഞ്ഞു. 2023-24 സാമ്പത്തിക വർഷം 13.58 കോടി രൂപ 18,847 തൊഴിലാളികൾക്കായി ഇൻകം സപ്പോർട്ട് പദ്ധതിയിൽ വിതരണം ചെയ്തു. 2024-25ൽ 12.494 കോടി രൂപ 14,061 തൊഴിലാളികൾക്കായി വിതരണം ചെയ്തു. പ്രൊഡക്ഷൻ & മാർക്കറ്റിംഗ് ഇൻസെന്റീവ് ഇനത്തിൽ 2022-23ൽ 10.5 കോടി രൂപയും, 2023-24ൽ 8.28 കോടി രൂപയും, 2024-25ൽ 6.4003 കോടി രൂപയും കയർ സംഘങ്ങൾക്കായി അനുവദിച്ചു.
കയർ വ്യവസായത്തിന്റെ ചരിത്രവും കരവിരുതും വൈവിധ്യവും പ്രദർശിപ്പിക്കാനും കയർ കേരളയെ ബ്രാൻഡ് ചെയ്യാനും ആലപ്പുഴയിൽ കയർ മ്യൂസിയങ്ങൾ സ്ഥാപിച്ചുവരുന്നു. മുസിരിസ് പ്രോജക്ട് ലിമിറ്റഡാണ് ഇതിന്റെ നിർമ്മാണം നടത്തുന്നത്. ഒഡീഷയിലെ ഖനിയിൽ കയർ ഭൂവസ്ത്രം വിരിക്കുന്നതിനുള്ള വിവിധ പദ്ധതികൾ നടപ്പാക്കുന്നു. എം.ജി.എൻ.ആർ.ഇ.ജി.എസ്. പദ്ധതി പ്രകാരം, 2024 മാർച്ച് വരെ 60 ലക്ഷം ച.മീറ്ററും, 2025 മാർച്ച് വരെ 51 ലക്ഷം ച.മീറ്ററും കയർ ഭൂവസ്ത്രം വിതരണം ചെയ്തു. ദേശീയപാതകളുടെ നിർമ്മാണത്തിൽ കയർ ഭൂവസ്ത്രം ഉപയോഗിക്കണമെന്ന സംസ്ഥാനത്തിന്റെ ആവശ്യം കേന്ദ്ര സർക്കാർ അംഗീകരിച്ചത് കയർ മേഖലക്ക് വലിയ അംഗീകാരമാണ്.
2020-21 ലെ വെർച്വൽ കയർ മേളയിൽ 750 കോടി രൂപയുടെ ഓർഡറുകൾ ലഭിച്ചത് കയർ ഉത്പന്നങ്ങളുടെ ആഗോള സ്വീകാര്യതയ്ക്ക് തെളിവാണ്. സർക്കാർ ധനസഹായത്തോടെ കയർ കോർപറേഷൻ ആരംഭിച്ച പരിശീലന പരിപാടി വഴി 300 പേർ പരിശീലനം പൂർത്തിയാക്കി.
കേരള സ്റ്റേറ്റ് കയർ കോർപ്പറേഷൻ തലസ്ഥാന നഗരിയിലെ ലുലു ഷോപ്പിംഗ് മാളിൽ അത്യാധുനിക മാട്രസ് എക്സ്പീരിയൻസ് ഷോറൂം ആരംഭിച്ചത് കയർ വ്യവസായ ചരിത്രത്തിലെ ഒരു സുപ്രധാന നാഴികക്കല്ലാണ്. കേരളത്തിന്റെ ചരിത്രത്തിൽ ആദ്യമായാണ് ഒരു സർക്കാർ പൊതുമേഖലാ സ്ഥാപനം ഇത്തരത്തിൽ അന്താരാഷ്ട്ര നിലവാരമുള്ള ഒരു ഷോറൂം തുറക്കുന്നത്. കയർ വ്യവസായത്തെ ആഗോള നിലവാരത്തിലേക്ക് ഉയർത്താനും തൊഴിലാളികളുടെ ജീവിതനിലവാരം മെച്ചപ്പെടുത്താനുമുള്ള പ്രവർത്തനങ്ങളാണ് സർക്കാർ തുടരുന്നത്.
