തദ്ദേശസ്വയംഭരണ തെരഞ്ഞെടുപ്പിന് മുന്നോടിയായി വോട്ടര് പട്ടികയില് പേര് ചേര്ക്കാനും തിരുത്തലുകള്ക്കും ജൂണ് 21 ന് വരെ അവസരം. 2024 ജനുവരി ഒന്നിനോ അതിന് മുമ്പ് 18 വയസ്സ് പൂര്ത്തിയായവര്ക്കാണ് വോട്ടര് പട്ടികയില് പേര് ചേര്ക്കാന് അവസരം. അപേക്ഷകര് www.sec.kerala.gov.in ലോഗിന് ചെയ്ത് ഓണ്ലൈനായി അപേക്ഷ സമര്പ്പിക്കണം. അക്ഷയ കേന്ദ്രം, അംഗീകൃത ജനസേവന കേന്ദ്രങ്ങള് മുഖേന അപേക്ഷ നല്കാം.
വോട്ടര് പട്ടിയില് പേര് ചേര്ക്കാന് ഫോറം നമ്പര് നാലിലും തിരുത്തലുകള്ക്ക് ഫോറം നമ്പര് ആറിലും ഒരു വാര്ഡില് നിന്നോ പോളിങ് സ്റ്റേഷനില് നിന്നോ സ്ഥലമാറ്റത്തിന് ഫോറം നമ്പര് ഏഴിലും അപേക്ഷ നൽകണം. വോട്ടര് പട്ടിക സംബന്ധിച്ച പരാതികള് ഫോറം നമ്പര് അഞ്ചില് ഓണ്ലൈനായി രജിസ്റ്റര് ചെയ്യണം. രജിസ്റ്റര് ചെയ്ത പരാതിയുടെ പ്രിന്റ്ഔട്ടില് ഒപ്പ് വെച്ച് നേരിട്ടോ, തപാല് മുഖേനയോ ബന്ധപ്പെട്ട ഇലക്ടറല് രജിസ്ട്രേഷന് ഓഫീസര്ക്ക് (നഗരസഭാ-ഗ്രാമപഞ്ചായത്ത് സെക്രട്ടറിമാര്) ലഭ്യമാക്കണം. ഓണ്ലൈന് രജിസ്ട്രേഷന് ഇല്ലാതെ ഫോറം നമ്പര് അഞ്ചില് ഇലക്ടറല് രജിസ്ട്രേഷന് ഓഫീസര്ക്ക് നേരിട്ടോ, തപാല് മാര്ഗമോ പരാതി അയയ്ക്കാം. ഓരോ പരാതികളിലുമുള്ള തീരുമാനം രേഖമൂലം ബന്ധപ്പെട്ട അപേക്ഷകരെ അറിയിക്കും. തീര്പ്പാകുന്ന പരാതികള് സംബന്ധിച്ച് അതത് ദിവസം ഇആര്എംഎസ്പോര്ട്ടലില് അപ്ഡേറ്റ് ചെയ്യും. അന്തിമ വോട്ടര് പട്ടിക ജൂലൈ ഒന്നിന് പ്രസിദ്ധീകരിക്കും
അവസാനമായി അപ്ഡേറ്റ് ചെയ്തത് :18-06-2024
