കേരളത്തിന്റെ ആരോഗ്യമേഖലയിൽ അതിനൂതന വികസനത്തിന് ഊന്നൽ നൽകി കൊണ്ട്, കോഴിക്കോട് ഗവൺമെൻറ് മെഡിക്കൽ കോളേജിൽ ഹൃദയം, കരൾ, വൃക്ക തുടങ്ങിയ അവയവങ്ങൾ മാറ്റിവയ്ക്കുന്നതിനുള്ള അത്യാധുനിക ഓപ്പറേഷൻ തീയേറ്ററുകൾ പ്രവർത്തനസജ്ജമായി. സർജിക്കൽ സൂപ്പർ സ്‌പെഷ്യാലിറ്റി ബ്ലോക്കിലാണ് 14 ഓപ്പറേഷൻ തീയേറ്ററുകൾ പൂർണ്ണമായും സജ്ജീകരിച്ചിരിക്കുന്നത്.
 
മെഡിക്കൽ കോളേജിൽ നിലവിൽ വൃക്ക മാറ്റിവയ്ക്കൽ ശസ്ത്രക്രിയ വിജയകരമായി നടക്കുന്നുണ്ട്. നേരത്തെ  കോട്ടയം മെഡിക്കൽ കോളേജിലും തിരുവനന്തപുരം മെഡിക്കൽ കോളേജിലും കരൾ മാറ്റിവയ്ക്കൽ ശസ്ത്രക്രിയകൾ വിജയകരമായി ആരംഭിച്ചിരുന്നു. ഇതിന്റെ തുടർച്ചയായാണ് കോഴിക്കോട് മെഡിക്കൽ കോളേജിലും കരൾ മാറ്റിവയ്ക്കൽ ശസ്ത്രക്രിയയ്ക്ക് ആവശ്യമായ എല്ലാവിധ സജ്ജീകരണങ്ങളും തയാറാക്കിയിരിക്കുന്നത്. ഇതിന്റെ ഭാഗമായി പുതിയ ഓപ്പറേഷൻ തീയേറ്ററുകളിൽ അവയവം മാറ്റിവയ്ക്കാനുള്ള അത്യാധുനിക സംവിധാനങ്ങൾ ഉൾപ്പെടെ സജ്ജീകരിച്ചിട്ടുണ്ട്. 

സർജിക്കൽ സൂപ്പർ സ്‌പെഷ്യാലിറ്റി ബ്ലോക്കിൽ കാർഡിയോ വാസ്‌കുലാർ സർജറി, യൂറോളജി, സർജിക്കൽ ഗ്യാസ്‌ട്രോഎൻട്രോളജി, ന്യൂറോസർജറി, പ്ലാസ്റ്റിക് സർജറി എന്നീ വിഭാഗങ്ങൾക്കായുള്ള ഓപ്പറേഷൻ തീയേറ്ററുകളും അത്യാധുനിക തീവ്രപരിചരണ വിഭാഗങ്ങളുമാണ് ഇപ്പോൾ പ്രവർത്തനമാരംഭിച്ചിരിക്കുന്നത്. ഓരോ വിഭാഗത്തിനും 20 ഐസിയു കിടക്കകൾ വീതം സജ്ജീകരിച്ചിട്ടുണ്ട്. എമർജൻസി മെഡിസിൻ വിഭാഗം ഈ ബ്ലോക്കിൽ നേരത്തെ തന്നെ പ്രവർത്തനം ആരംഭിച്ചിരുന്നു. കൂടാതെ, ഈ 5 സർജിക്കൽ സൂപ്പർ സ്‌പെഷ്യാലിറ്റി വിഭാഗങ്ങൾക്കൊപ്പം അനസ്‌തേഷ്യ വകുപ്പിന്റെ ഒരു വിഭാഗം കൂടി ഈ ബ്ലോക്കിലേക്ക് മാറ്റിയിട്ടുണ്ട്. സൂപ്പർ സ്‌പെഷ്യാലിറ്റി ബ്ലോക്കിലെ 190 ഐസിയു കിടക്കകളിൽ 20 എണ്ണം മസ്തിഷ്‌ക മരണം സംഭവിച്ചവരുടെ മൾട്ടി ഓർഗൻ ട്രാൻസ്പ്ലാന്റേഷിനും, 20 എണ്ണം വൃക്ക മാറ്റിവയ്ക്കലിനും, മറ്റ് 20 എണ്ണം തലയ്ക്ക് ഗുരുതര പരിക്കേറ്റവർക്കായുള്ള വിദഗ്ധ ചികിത്സയ്ക്കുമായി മാറ്റിവെച്ചിരിക്കുന്നു.

കേരളത്തിലെ സർക്കാർ മെഡിക്കൽ കോളേജുകളിൽ ആദ്യമായി ഫാമിലി മെഡിസിൻ, എമർജൻസി മെഡിസിൻ കോഴ്‌സുകൾ ആരംഭിച്ചത് കോഴിക്കോട് മെഡിക്കൽ കോളേജിലാണ്. ഇതിനു പുറമെ, അവയവദാനവും ടിഷ്യു മാറ്റിവയ്ക്കലും പ്രോത്സാഹിപ്പിക്കുന്നതിനായി കോഴിക്കോട് ഓർഗൻ ആൻഡ് ടിഷ്യു ട്രാൻസ്പ്ലാന്റ് ഇൻസ്റ്റിറ്റ്യൂട്ടും ഉടൻ പ്രവർത്തന സജ്ജമാകും. 

ആധുനികമായ ആരോഗ്യസൗകര്യങ്ങൾ വികസിപ്പിക്കുന്നതിൽ കേരളം നടപ്പാക്കുന്ന ശക്തമായ നിലപാടിന്റെ ഏറ്റവും പുതിയ ഉദാഹരണമാണ് കോഴിക്കോട് മെഡിക്കൽ കോളേജിലെ ഈ വിപുലമായ വികസനം. മികവുള്ള സാങ്കേതികതയും വിദഗ്ധ സംവിധാനങ്ങളും ഉൾക്കൊള്ളുന്ന ഈ സൗകര്യങ്ങൾ സംസ്ഥാനത്തെ സാധാരണക്കാർക്കും അന്താരാഷ്ട്ര നിലവാരത്തിലുള്ള ചികിത്സ ലഭ്യമാക്കുന്നതിൽ വലിയ പുരോഗതിക്ക് വഴിയൊരുക്കും. പുതിയ സൗകര്യങ്ങൾ നിലവിൽ വന്നതോടെ, അടുത്ത വർഷങ്ങളിൽ കോഴിക്കോട് ഗവൺമെൻറ് മെഡിക്കൽ കോളേജ് അവയവമാറ്റ ശസ്ത്രക്രിയാ രംഗത്ത് സംസ്ഥാനത്തിന്റെ പ്രധാന കേന്ദ്രമായി മാറും.

അവസാനമായി അപ്ഡേറ്റ് ചെയ്തത് : 2025-04-22 15:11:00